தமிழ்நாடு ஆசிரியர் தேர்வு வாரியம் மூலம் சிறப்பு ஆசிரியர்களான உடற்கல்வி, இசை, ஓவியம், தையல் ஆகிய பணியிடங்களில் 1,325 பேரை தேர்வு செய்வதற்கான அறிவிப்பு 2017ஆம் ஆண்டு ஜூலை மாதம் வெளியிடப்பட்டது. அவற்றில் தையல் பிரிவில் 249 பணியாளர்களை தேர்வு செய்வதற்கு போட்டி தேர்வு நடத்தப்பட்டது.
இந்நிலையில் ஆசிரியர் தேர்வு வாரிய தலைவர் லதா வெளியிட்டுள்ள செய்தி குறிப்பில் கூறப்பட்டுள்ளதாவது, ”ஆசிரியர் தேர்வு வாரியம் மூலம் 2012-2016ஆம் ஆண்டு சிறப்பு ஆசிரியர் காலி பணியிடங்கள் நேரடி நியமனம் மூலம் நிரப்புவது குறித்து விண்ணப்பித்தவர்களுக்கான எழுத்து தேர்வு 2017ஆம் ஆண்டு செப்டம்பர் மாதம் 23ஆம் தேதி வெளியிடப்பட்டது. அதனைத் தொடர்ந்து தேர்வு எழுதியவர்களுக்கு தேர்வு முடிவுகள் 2018ஆம் ஆண்டு ஜூன் மாதம் 14 ஆம் தேதி வெளியிடப்பட்டது.
தேர்வு முடிவுகளின் அடிப்படையில் சிறப்பாசிரியர் பணிக்கான தகுதி பெற்றவர்களில் தற்காலிக தேர்வு பட்டியல் 2018ஆம் ஆண்டு அக்டோபர் மாதம் 12ஆம் தேதி வெளியிடப்பட்டது. இதனை எதிர்த்து நீதிமன்றங்களில் தேர்வர்கள் வழக்கு தொடர்ந்தனர். அந்த வழக்கில் அளிக்கப்பட்ட தீர்ப்பின் அடிப்படையில் தற்போது புதிதாக தேர்வு செய்யப்பட்டவர்களில் தையல் ஆசிரியர் பணிக்கான தற்காலிக தேர்வு பட்டியல் ஆசிரியர் தேர்வு வாரிய இணையதளத்தில் வெளியிடப்பட்டுள்ளது.
மேலும் பள்ளி கல்வித்துறைக்கு 228 பேரும், கோயம்புத்தூர் மாநகராட்சி பள்ளிகளில் பணியாற்ற 2 பேரும் ,சமூகநலம் மற்றும் பாதுகாப்புத் துறையின் பள்ளிகளில் பணி புரிவதற்கு 19 பேருப் தேர்வு செய்யப்பட்ட தையல் ஆசிரியர்கள் பட்டியல் www.trb.tn.nic.in என்ற இணையதளத்தில் வெளியிடப்பட்டுள்ளது” இவ்வாறு அதில் கூறப்பட்டுள்ளது.
