இதுகுறித்து ஆசிரியர் தேர்வு வாரியம் வெளியிட்டுள்ள செய்திக்குறிப்பில், "ஆசிரியர் தேர்வு வாரியம் மூலம் 2017-18ஆம் ஆண்டுக்கான பாலிடெக்னிக் கல்லூரி விரிவுரையாளர் காலிப்பணியிடங்களுக்கு நேரடி நியமனத்திற்கு அறிவிப்பு வெளியிடப்பட்டது. அந்த வகையில் ஆன்லைன் மூலம் விண்ணப்பங்கள், கல்வித் தகுதி ஆவணங்கள் பெறப்பட்டன. இதையடுத்து விண்ணப்பதாரர்களின் கூடுதல் கல்வித் தகுதிகள், பணி அனுபவச் சான்றிதழ், நன்னடத்தை சான்றிதழ் உள்ளிட்ட பிற சான்றிதழ்களை ஆன்லைனில் பதிவேற்றம் செய்ய அறிவிப்பு வெளியிடப்பட்டது.
இதற்கான கால அவகாசம் 11.3.2022 முதல் 18.3.2022 வரை வழங்கப்பட்டது. இந்த சான்றிதழ்களை பதிவேற்ற கூடுதல் கால அவகாசம் கோரி விண்ணப்பதாரர்களிடமிருந்து கோரிக்கைகள் வந்தன. இந்த கோரிக்கைகளை ஏற்று பதிவேற்றம் செய்வதற்கு கால அவகாசம் 18.3.2022-லிருந்து 25.3.2022 வரை நீட்டிக்கப்பட்டது. இதைத்தொடர்ந்தும் விண்ணப்பதாரர்கள் கால அவகாசத்தை நீட்டிக்க கோரிக்கை வைத்துவருகின்றனர். இதையேற்று ஏப்ரல் 1ஆம் தேதி வரையில் கால அவகாசம் நீடிக்கப்படுகிறது.