முதலமைச்சர் பாதுகாப்புப் பணியில் இருந்த ட்ராஃபிக் போலீஸ் மீது வாகனம் மோதி விபத்து

பாதுகாப்புப் பணியில் இருந்த போக்குவரத்து உதவி ஆய்வாளர் மீது இருசக்கர வாகனம் மோதி விபத்துக்குள்ளானது. இதில் அவருக்கு எலும்பு முறிவு ஏற்பட்டு மருத்துவமனையில் அனுமதிக்கப்பட்டார்.

சென்னை:சென்னை விமான நிலையம் அருகே நேற்று(மார்ச்.6) முதலமைச்சர் வருகையின்போது போக்குவரத்து உதவி ஆய்வாளர் சுந்தர்ராஜன்(53), பாதுகாப்புப் பணியில் ஈடுபட்டிருந்தார். அப்போது அவ்வழியாக வரும் கனரக வாகனங்களைத் திருப்பி விட்டுக் கொண்டிருந்தார்.

அப்போது கிண்டி நோக்கி வந்த இருசக்கர வாகனம் ஒன்று அவர் மீது மோதியது. இதில் நிலை தடுமாறி கீழே விழுந்த அவருக்கு முகத் தாடையில் எலும்பு முறிவு ஏற்பட்டது. உடனே அங்குள்ளவர்கள் ரத்தம் சொட்ட, சொட்ட சிகிச்சைக்காக குரோம்பேட்டை அரசு மருத்துவமனைக்கு அனுப்பிவைத்தனர்.

விசாரணையில் விபத்து ஏற்படுத்தியவர் பல்லாவரத்தில் உள்ள தனியார் கல்லூரியில் இரண்டாமாண்டு படிக்கும் மாணவர்களான மதன்(21), மற்றும், அபீஸ் அகமது என்பது தெரியவந்தது. இருவரிடமும் குரோம்பேட்டை போக்குவரத்து புலனாய்வுப் பிரிவு போலீசார் விசாரித்து வருகின்றனர்.

இதையும் படிங்க:மதுரை சிறுமி உயிரிழந்த விவகாரம்: எஸ்பி விளக்கம்