மத்திய அரசின் தொடர் தமிழர் விரோத போக்கை கண்டித்து தமிழக வாழ்வுரிமைக் கட்சி சார்பில் சென்னை வள்ளுவர் கோட்டத்தில் கண்டன ஆர்ப்பாட்டம் நடைபெற்றது.
இந்த ஆர்ப்பாட்டத்துக்கு பின்னர் பின் பேசிய தமிழக வாழ்வுரிமைக் கட்சி தலைவர் தி. வேல்முருகன்,
மத்திய, மாநில அரசுகள் சேர்ந்து தமிழ் மக்கள் விரோத திட்டங்களை செயல்படுத்தி வருகிறது. தமிழகத்தில் நீட் திணிக்கப்பட்டுள்ளது.
ஜி.எஸ்.டி, எட்டு வழிச்சாலை, ஹைட்ரோ கார்பன் போன்ற திட்டங்கள் திணிக்கப்பட்டு வருகிறது. மத்திய அரசு தமிழர்களை இரண்டாம் தர குடிமக்களாக நடத்துகிறது.
இந்த நிலையில், இரண்டாவது முறையாக ஆட்சி பொறுப்பேற்ற நரேந்திர மோடிக்கு எதிராக தமிழகத்தில் முதல் போராட்டத்தை தொடங்கியுள்ளோம். ஏழு பேர் விடுதலை என்பது முதலமைச்சர் கூறுவது போல் தனிநபருக்கு வழங்கப்படும் முன்னுரிமை இல்லை.
ஜெயலலிதா முதலமைச்சராக இருந்தபோது இதே ஏழு பேர் விடுதலைக்கு தீர்மானத்தை நிறைவேற்றினார். அவர்களின் வழியாக ஆட்சி செய்கின்ற அரசு என்று கூறும் இவர்கள், இந்த ஏழு பேர் விடுதலைக்கு தீர்மானம் நிறைவேற்றி அதற்கு ஒப்புதல் அளிக்க மறுக்கும் ஆளுநரை திரும்பப் பெற வேண்டும். அவரை வைத்துகொண்டு எங்களால் ஆட்சி செய்ய முடியாது என்று சொல்வதற்கு எடப்பாடிக்கு தார்மீக உரிமை இருக்கிறதா? என்று கேள்வி எழுப்பினார்.
