பி.இ., பி.எட். படித்தாலும் ஆசிரியர் வேலை கிடையாது - தேர்வு வாரியம்

சென்னை: பி.இ., பி.எட். முடித்தவர்களை ஆசிரியர் தகுதித் தேர்வுக்கு அனுமதிப்பது குறித்து தற்போதுவரை எந்த முடிவும் எடுக்கப்படவில்லை என ஆசிரியர் தேர்வு வாரியம் தெரிவித்துள்ளது.

தேசியக் கல்வி மற்றும் ஆசிரியர் நிறுவனத்தின் புதிய விதிமுறைகளின் அடிப்படையில் பி.இ. (பொறியியல்) படிப்பில், கணினி அறிவியல், தகவல் தொழில்நுட்பம் உள்ளிட்ட சில பாடப் பிரிவுகளை படிக்கும் மாணவர்கள் விரும்பினால் பி.எட். படிப்பதற்கு தமிழ்நாடு அரசு ஏற்கனவே அனுமதி வழங்கியிருக்கிறது. அதனடிப்படையில் பி.இ., பி.எட். படிக்கக் கூடிய மாணவர்கள், ஆசிரியர் தகுதித் தேர்வை எழுதி அதன்பின் மற்றொரு தேர்வை எழுதி தேர்வு பெற்றால் மட்டுமே ஆசிரியர் பணி கிடைக்க வாய்ப்புள்ளது.

இதற்கிடையே, உயர் கல்வித் துறை வெளியிட்ட அரசாணை ஒன்றில், பி.இ. (கணிதம்), பி.எட். படிப்பவர்கள் ஆறாம் வகுப்பு முதல் எட்டாம் வகுப்பு வரையிலான ஆசிரியர் பணியில் சேரத் தகுதி பெறுகிறார்கள் எனத் தெரிவிக்கப்பட்டுள்ளது.

இது குறித்து, ஆசிரியர் தேர்வு வாரியம் தரப்பில், பி.இ., பி.எட். படித்தவர்களுக்கு ஆசிரியர் தகுதித் தேர்வு நடத்த அனுமதிப்பது குறித்து தற்போதுவரை எந்த முடிவும் எடுக்கப்படவில்லை என்றும் முறையாக தங்கள் துறை சார்பில் அரசாணை வெளியானால் மட்டுமே ஆசிரியர் தகுதித் தேர்வுக்கு பி.இ., பி.எட் படித்தவர்களை அனுமதிக்கலாமா? எனத் தெரியவரும் என்று தெரிவிக்கப்பட்டுள்ளது.

ஆசிரியர் தகுதித் தேர்வுக்குப் பிறகு மற்றொரு போட்டித் தேர்வை எழுதி தேர்வு பெற வேண்டுமென ஏற்கனவே தமிழ்நாடு அரசு அரசாணை வெளியிட்டபோதும், இதுவரை ஒரு தேர்வுகூட நடத்தப்படவில்லை என்பது குறிப்பிடத்தக்கது.

இதையும் படிங்க: "நான் தான் பொம்மை பேசுறேன்" - விழிப்புணர்வு பாடம் நடத்தும் ஆசிரியர்