இந்தியா விற்பனைக்கு வந்து 15ஆண்டுகள் ஆகிறது - நாம் தமிழர் சீமான்!

சென்னை: இந்தியா விற்பனையாகி 15 ஆண்டுகள் ஆகிறது என நாம் தமிழர் கட்சியின் தலைமை ஒருங்கிணைப்பாளர் சீமான் கூறியுள்ளார்.

சென்னை, மீனம்பாக்கம் விமான நிலையத்தில் நாம் தமிழர் கட்சியின் தலைமை ஒருங்கிணைப்பாளர் சீமான் செய்தியாளர்களிடம் பேசுகையில், நீண்டகாலமாக அரசியலில் உழைத்துள்ள தமிழிசை சவுந்தரராஜனை அங்கீகரித்து ஆளுநராக நியமித்துள்ளனர். தமிழ்நாட்டை சேர்ந்தவர் ஆளுநராக வந்தது மிகவம் மகிழ்ச்சியாக இருக்கிறது.

முதலமைச்சர் வெளிநாட்டு பயணத்தின் மூலம் என்ன கொண்டு வருகிறார் என்பதை பார்ப்போம். அது வெற்று பயணமாக அமையதான் அதிக வாய்ப்புள்ளது. பொருளாதாரத்தை மோசமான நிலைக்கு கொண்டு சென்றுவிட்டீர்கள் என சுப்பிரமணிய சாமி கூறியுள்ளதைப்பற்றிய சிந்தனையே கிடையாது. இவர்கள் பசு மாடு, ராமர் கோயில், பாகிஸ்தான் போன்ற விவகாரங்களை வைத்து அரசியல் செய்துவிடலாம் என நினைத்து கொண்டுள்ளனர்.

பொதுத்துறை வங்கிகளை தனியார் வங்கிகளில் இணைப்பதில் எந்த ஒரு வளர்ச்சியும் இல்லை. இதன் மூலம் வேலை வாய்ப்புகள்தான் இழக்க நேரிடும். இந்தியாவில், அனைத்தும் தனியார் மயமாக்கப்பட்டுள்ளது. கல்வி, மருத்துவமனை, தொடர்வண்டி, ஆயுத உற்பத்தி என அனைத்தும் தனியாரிடம் கொடுக்கப்பட்டுள்ளது. ஏன் இந்தியாவே விற்பனைக்கு வந்து 15 ஆண்டுகள் ஆகிவிட்டன.

துப்பாக்கிச்சூட்டில் வெற்றி பெற்று தங்கம் வென்ற இளவேனில், சொந்த ஊருக்கு வரும்போது அவரை வரவேற்க, பாராட்ட ஒருவரும் வரவில்லை.இதுவே, நடிகை விருது வாங்கி வந்திருந்தால் பாராட்டு விழா நடத்துவார்கள்” என்றார்.