'சோதனைக் கருவிகள் மூலம் கொள்ளை லாபம் பார்த்திருப்பது ஈவு, இரக்கமற்ற செயல்' - கே.எஸ்.அழகிரி

சென்னை: ஈவு, இரக்கமற்ற முறையில் சோதனைக் கருவிகளை கொள்முதல் செய்வதில் கொள்ளை லாபம் சம்பாதிக்க முயன்றிருப்பது நெஞ்சை உலுக்கும் செயல் என்று, தமிழ்நாடு காங்கிரஸ் தலைவர் கே.எஸ். அழகிரி விமர்சித்துள்ளார்.

இது தொடர்பாக அவர் இன்று வெளியிட்டுள்ள அறிக்கையில், "சீனாவில் இருந்து இறக்குமதி செய்யப்பட்ட துரித சோதனைக் கருவியின் அடக்கவில்லை 245 ரூபாய். இந்நிறுவனத்திடம் கருவியின் தரத்தை உறுதி செய்து நேரடியாக கொள்முதல் செய்யாமல் வேறொரு விநியோகஸ்தர் மூலம் ரூ. 600க்கு ஐ.சி.எம்.ஆர். கொள்முதல் செய்யப்பட்டது ஏன்?

ரேபிட் டெஸ்ட் கருவிகளை ஐ.சி.எம்.ஆர். வாங்கிய ஆர்க் நிறுவனத்திடம் வாங்காமல் அங்கீகரிக்கப்பட்ட பட்டியலில் இல்லாத விநியோகஸ்தரான ஷான் பையோடெக் மூலம் ஒரு கருவி ரூ. 600க்கு தமிழ்நாடு அரசு கொள்முதல் செய்தது ஏன்? தகுதியான நிறுவனத்திடம் தரமான சோதனைக் கருவிகளை வாங்கமுடியாத மத்திய, மாநில அரசுகள் கரோனா நோயிலிருந்து 136 கோடி மக்களை எப்படி காப்பாற்றப்போகிறார்கள்?

சோதனையான இந்த நேரத்தில் ஈவு, இரக்கமற்ற முறையில் சோதனைக் கருவிகளை கொள்முதல் செய்வதில் கொள்ளை லாபம் சம்பாதிக்க முயன்றிருப்பது நெஞ்சை உலுக்குவதாக இருக்கிறது. சோதனைக் கருவிகள் கொள்முதல் மூலம் கூடுதல் லாபம் ஈட்ட அனுமதித்திருக்கலாமா என்ற கேள்விக்கு மத்திய அரசிடம் பதில் இல்லை.

இதைப் பற்றி மத்திய அரசு வாய் திறக்க மறுக்கிறது. இப்படி அமைதியாக இருந்தால், கொள்ளை லாபம் ஈட்டிய நிறுவனங்களுக்கு நீங்கள் ஆதரவு அளித்ததாகவோ அல்லது உதவி செய்ததாகவோ பொருள்படும் என்பதை எவராலும் மறுக்க இயலாது". இவ்வாறு அந்த அறிக்கையில் குறிப்பிடப்பட்டுள்ளது.