அண்ணா பல்கலை. பெயர் மாற்றம் அநீதியானது - ராமதாஸ்

சென்னை: அண்ணா பல்கலைக்கழகத்திற்கு அதன் ஆராய்ச்சியாலும், கல்வியாலும் கிடைத்த நற்பெயர்கள் அனைத்தையும் ஒரு பெயர் மாற்றத்தால் விட்டுக்கொடுக்க முடியாது என பாமக நிறுவனர் ராமதாஸ் தெரிவித்துள்ளார்.

இதுதொடர்பாக அவர் வெளியிட்டுள்ள அறிக்கையில், “உலகின் புகழ்பெற்ற தொழில்நுட்பப் பல்கலைக்கழகங்கள் அனைத்துமே ஒருமைப் பல்கலைக்கழகங்களாக இருப்பது தான் அவற்றின் வெற்றிக்கும், புதிய ஆராய்ச்சிகள் மற்றும் கண்டுபிடிப்புகளுக்கும் காரணம் ஆகும். அந்த வகையில், புகழ்பெற்ற தொழில்நுட்பக் கல்வி நிறுவனமாகவும், இணைப்பு பல்கலைக்கழகமாகவும் திகழும் அண்ணா பல்கலைக்கழகம் ஒருமைப் பல்கலைக்கழகமாகவும், பிற பொறியியல் கல்லூரிகளை ஆளுமை செய்யும் இணைப்புப் பல்கலைக்கழகமாகவும் பிரிக்கப்படுவது முற்போக்கு நடவடிக்கை ஆகும்.

ஆனால், பிரிக்கப்படும் பல்கலைக்கழகத்திற்கு பெயர் வைப்பதில் நடக்கும் குளறுபடிகள் தான் அண்ணா பல்கலைக்கழகத்தின் முன்னாள், இந்நாள் மாணவர்கள் மற்றும் ஆசிரியர்களிடையே கொந்தளிப்பை ஏற்படுத்தியிருக்கிறது. வழக்கமாக ஒரு பல்கலைக்கழகம் பிரிக்கப்படும் போது, மூலப் பல்கலைக்கழகத்திற்கு அதன் பெயரை அப்படியே வைத்து விட்டு, பிரித்து புதிதாக உருவாக்கப்பட்ட பல்கலைக்கழகத்திற்கு புதிய பெயர் சூட்டுவது தான் வழக்கமாகும். ஆனால், இங்கு பிரித்து புதிதாக உருவாக்கப்பட்ட இணைப்புப் பல்கலைக்கழகத்திற்கு அண்ணா பல்கலைக்கழகம் என்று பெயர் வைத்து விட்டு, இதுவரை அண்ணா பல்கலைக்கழகம் என்ற பெயரில் செயல்பட்டு வந்த அமைப்புக்கு அண்ணா தொழில்நுட்ப மற்றும் ஆராய்ச்சிப் பல்கலைக்கழகம் என்று பெயர் சூட்டப்படவிருப்பது தான் கொந்தளிப்புக்கு காரணமாகும்.

கடந்த 32 ஆண்டுகளில் மேற்கொள்ளப்பட்ட ஆராய்ச்சிகள், கண்டுபிடிப்புகள், வழங்கப்பட்ட தரமான கல்வி ஆகியவற்றின் பயனாக அண்ணா பல்கலைக்கழகத்திற்கு உலகளவில் நல்ல பெயரும், ஏராளமான தரச்சான்றிதழ்களும் கிடைத்துள்ளன. ஆனால் பெயரை மாற்றும்போது, உண்மையான அண்ணா பல்கலைக்கழகத்திற்கு அதன் ஆராய்ச்சியாலும், கல்வியாலும் கிடைத்த நற்பெயர்கள் அனைத்தும் பறிக்கப்பட்டு, புதிய பல்கலைக்கழகத்துடன் இணைக்கப்படும் தனியார் கல்லூரிகளுக்கு சென்று விடும். இது எந்த வகையிலும் நியாயப்படுத்த முடியாத அநீதி.

ஒருமைப் பல்கலைக்கழகத்திற்கு அண்ணா பல்கலைக்கழகம் என்று பெயர் சூட்டப்படாவிட்டால், அந்த பல்கலைக்கழகம் பெற்ற பெருமைகள், பன்னாட்டு கல்வி நிறுவனங்களுடனும், தொழில் நிறுவனங்களுடனும் செய்து கொண்ட ஒப்பந்தங்கள் செல்லாமல் போய்விடும். கடந்த காலங்களில் மாணவ, மாணவியர் பெற்ற சான்றிதழ்களுக்கு மதிப்பில்லாமல் போய்விடும். எனவே, ஒருமைப் பல்கலைக்கழகம் தொடர்ந்து அண்ணா பல்கலைக்கழகம் என்ற பெயரில் செயல்பட அனுமதிக்க வேண்டும். புதிய பல்கலைக்கழகத்திற்கு அண்ணா இணைப்பு பல்கலைக்கழகம் என்று பெயர் சூட்ட வேண்டும் “ என்று வலியுறுத்தியுள்ளார்.

இதையும் படிங்க: கால்நடை மருத்துவமனைகளை சீரமைக்க ரூ.1,140 கோடி தேவை - மத்திய அமைச்சரிடம் கோரிக்கை