‘எந்த ஊரு? உன் சாதி என்ன?’ - செய்தியாளரிடம் எகிறிய கிருஷ்ணசாமி

சென்னை: பத்திரிகையாளர்கள் சந்திப்பின்போது ‘நீ எந்த ஊரு? உன் சாதி என்ன?’ என கிருஷ்ணசாமி ஒரு செய்தியாளரிடம் ஒருமையில் பேசியது பரபரப்பை ஏற்படுத்தியுள்ளது.

தென்காசி மக்களவைத் தொகுதியில் அதிமுக கூட்டணியில் போட்டியிட்டு திமுக வேட்பாளர் தனுஷ் குமாரிடம் தோல்வியடைந்த புதிய தமிழகம் கட்சியின் தலைவர் கிருஷ்ணசாமி சென்னையில் இன்று செய்தியாளர்களிடம் பேசினார்.

கட்சியின் தலைமை அலுவலகத்தில் நடைபெற்ற இந்தச் சந்திப்பின்போது கிருஷ்ணசாமியிடம் ஹைட்ரோகார்பன், நியூட்ரினோ திட்டங்கள் குறித்து செய்தியாளர்கள் கேள்வி எழுப்பினர். இதற்கு பதில் அளிக்காமல் செய்தியாளர்கள் குறித்தும் அவர்கள் பணியாற்றும் செய்தி நிறுவனங்கள் குறித்தும் கிருஷ்ணசாமி சர்ச்சைக்குரிய வகையில் பேசினார்.

அப்போது, தென்காசி தொகுதியில் போட்டியிட்ட நீங்கள் தோல்வி அடைந்ததற்கு காரணம் என்ன? அதனை புதிய தமிழகம் கட்சி ஆய்வு செய்துவிட்டதா? என்று செய்தியாளர் ஒருவர் எழுப்பிய கேள்விக்கு, ’நீ ஏன் இந்தக் கேள்வியையே தொடர்ந்து கேட்கிறாய். நீ எந்த ஊர், எந்த சாதி?’ என்று ஆவேசமாக கேட்டார்.