பொது பல்கலைக்கழக நுழைவுத்தேர்வு(CUET) மாநில கல்வி உரிமைகளைப் பாதிக்காது - மத்திய அமைச்சர் கடிதம்!

பொது பல்கலைக்கழக நுழைவுத் தேர்வு (CUET) யூனியன் பிரதேசம் மற்றும் மாநில கல்வி உரிமைகளைப் பாதிக்காது என மத்திய அமைச்சர் கல்வி அமைச்சர் தர்மேந்தர பிரதான், உயர் கல்வித்துறை அமைச்சர் பொன்முடிக்கு கடிதம் எழுதியுள்ளார்.

சென்னை:கடந்த 12ஆம் தேதி நடைபெற்ற சட்டப்பேரவையில் மத்திய அரசு கொண்டு வரும் பொது பல்கலைக்கழக நுழைவுத்தேர்வினை (CUET) தமிழ்நாட்டில் நடத்தக்கூடாது எனவும்; அவ்வாறு இத்தேர்வினை நடத்தினால் மாநில கல்வி உரிமைகள் பாதிக்கப்படும் எனவும் பேசிய முதலமைச்சர் மு.க.ஸ்டாலின் சட்டப்பேரவையில் தீர்மானம் நிறைவேற்றினார்.

இந்நிலையில் உயர்கல்வித்துறை அமைச்சர் பொன்முடிக்கு மத்திய அமைச்சர் தர்மேந்தர பிரதான் எழுதிய கடிதத்தில்: "கல்வியானது பொதுப்பட்டியலில் இருப்பதால் நாட்டின் கல்வி வளர்ச்சிக்கான நடவடிக்கைகளை மத்திய அரசு எடுக்க உதவுகிறது. "CUET” ஆனது மாணவர்கள் பயிற்சி எடுப்பதற்கான தேவையை நீக்குவதை நோக்கமாகக் கொண்டுள்ளது. மேலும் கோச்சிங் கலாசாரத்திற்கு எதிராக புதிய கல்வி கொள்கை(2020) உள்ளது.

இந்த தேர்வு முறையால் ஒரே விண்ணப்பத்தில் பல பல்கலைக்கழகங்களுக்கு ஒரே நேரத்தில் விண்ணப்பிக்கலாம். இதனால் மாணவர்களுக்கு நிதிச்சுமை குறையும்.மேலும் இந்தியா முழுவதும் இத்தேர்வு 13 மொழிகளில் நூற்றுக்கும் மேற்பட்ட தேர்வு மையங்களில் நடப்பதால் மாணவர்கள், தங்களுக்குத்தேவையான மொழியைத்தேர்ந்தேடுத்து தேர்வு எழுதிக்கொள்ளலாம். இத்தேர்வு முறை யூனியன் மற்றும் மாநில உரிமைகளைப் பாதிக்காது'' என அக்கடிதத்தில் குறிப்பிட்டுள்ளார்.

இதையும் படிங்க:மத்திய பல்கலைக்கழகங்களில் இளநிலை படிப்புக்கு நுழைவுத் தேர்வை எதிர்த்து தீர்மானம்