'கோயம்பேடு சந்தைக்கு வர வேண்டாம்' - அங்காடி நிர்வாகம் வேண்டுகோள்

கோயம்பேடு சந்தை இனி 10 மணி வரை மட்டுமே செயல்படும். கூட்ட நெரிசலை தவிர்க்க, பொதுமக்கள் கோயம்பேடு சந்தைக்கு வர வேண்டாம் என சந்தை நிர்வாகம் கேட்டுக்கொண்டுள்ளது.

சென்னை: கரோனா தொற்று பாதிப்பு அதிகரித்து வரும் சூழ்நிலையில், தமிழ்நாடு அரசு ஊரடங்கு விதிகளை கடுமையாக்கி இருக்கிறது. தேவையில்லாமல் வெளியில் வருபவர்கள் மீது நடவடிக்கை எடுக்கப்படும் எனவும் தெரிவிக்கப்பட்டுள்ளது.

மளிகை, காய்கறி உள்ளிட்ட அத்தியாவசிய பொருட்கள் விற்பனை செய்யும் கடைகள் காலை 6 மணி முதல் 10 மணி வரை மட்டுமே திறந்திருக்க அனுமதிக்கப்பட்டுள்ளது. நடைபாதை காய்கறி, பழம் பூ கடைகள் திறந்திருக்க அனுமதி மறுக்கப்பட்டிருக்கிறது.

இந்த சூழ்நிலையில் தொற்று முன்னெச்சரிக்கை நடவடிக்கையாக கோயம்பேடு காய், கனி, மலர் சந்தைக்கு பொதுமக்கள் வர வேண்டாம் என அங்காடி நிர்வாகம் கேட்டுக்கொண்டுள்ளது.

இன்று(மே15) முதல் காலை 10 மணி வரை மட்டுமே சந்தை இயங்கும் என்றும் பொதுமக்கள் சந்தைக்கு வந்தால் கூட்ட நெரிசல் ஏற்படும் என்பதால் பொதுமக்கள் யாரும் கோயம்பேடு சந்தைக்கு வர வேண்டாம் என தெரிவிக்கப்பட்டுள்ளது.

இதன் காரணமாக கோயம்பேடு சந்தை வளாகத்திற்குள் தனியார் வாகனங்கள், சொகுசு நான்கு சக்கர வாகனங்கள், பொது மக்கள் பயணிக்கும் ஆட்டோக்களுக்கு அனுமதி இல்லை என அங்காடி நிர்வாகம் அறிவித்துள்ளது.

கடந்த ஆண்டு கோயம்பேடு சந்தை மூலமாகவும் கரோனா பாதிப்பு தமிழ்நாடு முழுவதும் பரவியது குறிப்பிடத்தக்கது.

இதையும் படிங்க:அடுத்த 18 மணி நேரத்தில் அதி தீவிர புயலாக மாறும் ’தவ் தே’