ஊதியம் அளித்த சான்றுகளை தனியார் கல்லூரிகள் சமர்ப்பிக்க முதலமைச்சரிடம் மனு!

சென்னை: ஊதியம் கொடுத்த சான்றிதழ்களை தனியார் கல்லூரிகள் சமர்ப்பிக்க உத்தரவிடக்கோரி முதலமைச்சருக்கு கடிதம் மூலம் மனு அளிக்கப்பட்டுள்ளது.

அகில இந்திய தனியார் பொறியியல் கல்லூரி ஆசிரியர் கூட்டமைப்பின் நிறுவனர் கார்த்திக் தமிழ்நாடு முதலமைச்சருக்கு அனுப்பியுள்ள கடிதத்தில், “ஊரடங்கு நேரத்திலும் பல தனியார் பள்ளி, கல்லூரிகள் ஆசிரியர்களுக்கு ஊதியம் கொடுக்க மறுக்கின்றன. இதற்கு காரணம் அரசு வைத்துள்ள மாணவரின் கல்வி உதவித்தொகை நிலுவைதான் என்கின்றனர். மேலும், மாணவரிடம் கட்டணம் பெறக் கூடாது என அரசு கூறியதையும் காரணம் காட்டுகின்றன இந்தத் தனியார் கல்வி நிறுவனங்கள். இரண்டு காரணங்களும், துளியும் ஏற்றுக்கொள்ள முடியாததாகும்.

கல்வி அறக்கட்டளைகள் என்பது தனது சொந்தப் பணத்தைக் கொண்டு கல்வியை சேவையாக நடத்த வேண்டும் என்பதையே சட்டம் சொல்கிறது. ஆனால், கல்வியை வியாபார படுத்துதலோ, மாணவரின் கல்விக் கட்டணத்தில் மட்டுமே பள்ளி, கல்லூரியை இயக்குவோம் என்று பிடிவாதம் பிடிப்பதோ அபத்தம். அரசானது இன்று அல்லது நாளை நிலுவைத் தொகையினை கொடுக்கத்தான் போகிறது. அவ்வாறு கல்வி உதவித் தொகை விடுவிக்கப்படும் போது எந்த தனியார் கல்லூரியும், அத்தொகையை வெளிப்படையாக செலவு செய்வதோ, கணக்கு காண்பிப்பதோ கிடையாது.

இந்நிலையில், அரசு உதவித்தொகை வழங்கியவுடன் ஊதியம் வழங்குவோம் என்பதை எவ்வாறு நம்ப முடியும். அனைத்து தனியார் பள்ளிகளில் உள்ள ஆசிரியருக்கும், பணியாளர்களுக்கும் ஏப்ரல் 2020 மாதத்தின் ஊதியத்தினை காலதாமதம் இல்லாமல் வழங்கிவிட்டு அதன் விவரத்தினை சம்பந்தப்பட்ட கல்வி அலுவலருக்கு அனுப்ப உத்தரவிடப்பட்டுள்ளது. இதே போல தமிழகத்தில் ஒரு பல்கலைக்கழகம் கூட செய்யவில்லை என்பது வருத்தத்திற்குரியது.

எனவே, முதலமைச்சர் நடவடிக்கை எடுத்து, வங்கிகள் மூலம் ஆசிரியர்களுக்கு சம்பளம் கொடுத்த வங்கி அறிக்கையை தனியார் கல்லூரிகளிடம் இருந்து அந்தந்த பல்கலைக்கழகம் ஏப்ரல் முதல் வாரத்திற்குள் பெற்றிட வேண்டும் என, உயர் கல்வித்துறை வாயிலாக உத்தரவு பிறப்பிக்க வேண்டும். தனியார் பல்கலைக்கழகங்களையும் தொழில்நுட்பக் கல்வி மாவட்ட கூடுதல் இயக்குநரிடம் அறிக்கை அளிக்க உத்தரவிட வேண்டும்” எனக் கூறியுள்ளார்.

இதையும் படிங்க: கரோனா தடுப்புப் பணியில் ஆசிரியர்கள் - பள்ளிக் கல்வித் துறை