'அரசு பாலிடெக்னிக் மாணவர்களுக்கு வெளிநாட்டில் பயிற்சி' - கே.பி அன்பழகன்

சென்னை: 100 பாலிடெக்னிக் மாணவர்களுக்கு வெளிநாட்டில் பயிற்சி அளிக்கப்பட உள்ளது என்றும் திறந்தநிலைப் பல்கலை கழக மாணவர்களுக்கு இணையவழி மூலமாக கல்வி கற்பிக்கப்படும் என்றும் உயர்கல்வி துறை அமைச்சர் கே.பி. அன்பழகன் அறிவித்துள்ளார்.

சட்டப்பேரவை கூட்டத்தில் நடைப்பெற்ற விவாதத்தில் உயர் கல்வித்துறை மானிய கோரிக்கை மீது எழுப்பப்பட்ட கேள்விக்கு பதில் அளித்து உயர்கல்வித்துறை அமைச்சர் கே.பி. அன்பழகன் பேசுகையில், "அரசு கலை, அறிவியல் கல்லூரிகளில் படிக்க மாணவர்கள் அதிக ஆர்வம் காட்டுவதால் இளங்கலை, முதுகலை பட்டப்படிப்புகளில் புதிதாக 81 பாடப் பிரிவுகள் 2019-2020ஆம் கல்வியாண்டில் தொடங்கப் படும்.

தருமபுரி மாவட்டம் பாலக்கோடு, நாமக்கல் மாவட்டம் மோகனூர் ஆகிய இடங்களில் அமைந்துள்ள அரசு பலவகை தொழில்நுட்ப கல்லூரிகளில் பயிலும் மாணவர்களுக்கு, தொழில்நுட்ப கல்வியை சிறப்பான முறையில் வழங்கும் பொருட்டு அகில இந்திய தொழில்நுட்ப கல்வி குழுமத்தால் வரையறை செய்யப்பட்டுள்ளது. அதன்படி அக்கல்லூரிகளில் உட்கட்டமைப்பு வசதிகளான ஆய்வகம், நூலகம், பயிற்சிப் பட்டறை, வகுப்பறை உள்ளிட்ட கட்டடங்கள் கட்டப்படும். சென்னை மாநிலக் கல்லூரியில் பயிலும் மாணவிகளுக்கு, மகளிர் விடுதி கட்டடம் கட்டப்படும்.

தமிழ்நாடு திறந்தநிலைப் பல்கலை கழகத்தில் இணையவழிக் கல்வி சட்டத்தின் கீழ் பாடங்களை நடத்துவதற்கு நடவடிக்கை மேற்கொள்ளப்படும். அங்கு உதவி மையங்கள் மற்றும் தேர்வு மையங்கள், 91 அரசு கலை மற்றும் அறிவியல் கல்லூரிகளில் நிறுவப்படும்.

அரசுப் பொறியியல் கல்லூரி மாணவர்களைப் போல, பலவகை தொழில்நுட்பக் கல்லூரியில் படிக்கு மாணவர்களின் திறனை உலகளவில் மேம்படுத்தும் வகையில் அயல் நாட்டில் உள்ள பல்கலைக்கழகங்கள், கல்லூரிகளுக்கு 100 மாணவர்கள் தேர்ந்தெடுக்கப்பட்டு அனுப்பி வைக்கப்படுவர்" என்றும் தெரிவித்தார்.