சவுதி ஏா்லைன்ஸ் விமானத்தில் வந்த பயணி உயிரிழப்பு... அவசரமாக தரையிறங்கிய விமானம்

மதினாவிலிருந்து மலேசியா நாட்டின் கோலாலம்பூா் சென்று கொண்டிருந்த சவுதி ஏா்லைன்ஸ் விமானத்தில் பயணி ஒருவருக்கு திடீரென உடல் நலம் பாதிப்பு ஏற்பட்டது. இதனால் விமானம் அவசரமாக தரையிறக்கப்பட்டது.

சென்னை:சவுதி அரேபியா நாட்டில் உள்ள மதினா நகரிலிருந்து, சவுதி ஏர்லைன்ஸ் போயிங் ரக விமானம் 272 பயணிகளுடன், மலேசிய நாட்டு தலைநகர் கோலாலம்பூருக்கு சென்று கொண்டு இருந்தது. அந்த விமானம் சென்னை வான்வெளியை கடந்து செல்லும் போது, அந்த விமானத்தில் பயணித்த மலேசியா நாட்டை சேர்ந்த அட்நம் பின் மாமத்(55) என்ற பயணிக்கு திடீரென நெஞ்சுவலி ஏற்பட்டது.

உடனே அவருடைய மனைவி நபீஷம் பிந்த் கதறி அழுதார். இதையடுத்து விமான பணிப்பெண்கள் விமானிக்கு தகவல் தெரிவித்தனர். இதையடுத்து விமானி அவசரமாக, சென்னை விமான நிலைய கட்டுப்பாட்டு அறைக்கு தகவல் கொடுத்து, மருத்துவ சிகிச்சைக்காக விமானம் சென்னையில், அவசரமாக தரையிறங்க வேண்டும் என்று அனுமதி கேட்டார்.

சென்னை விமான நிலைய கட்டுப்பாட்டு அறை அதிகாரிகள், டெல்லியில் உள்ள தலைமை கட்டுப்பாட்டு அறைக்கு தகவல் தெரிவித்தனர். அவர்கள் உடனடியாக அந்த விமானம் சென்னையில் தரையிறங்க அனுமதிக்கும்படியும், அதோடு மருத்துவ சிகிச்சைக்கு தேவையான உதவிகளை செய்யும்படியும் கூறினர்.

இதனையடுத்து சவுதி அரேபியா ஏர்லைன்ஸ் விமானம் சென்னையில் இன்று பகல் 12 மணியளவில், சென்னை சர்வதேச விமானநிலையத்தில் அவசரமாக தரையிறங்கியது. உடனடியாக சென்னை விமான நிலைய மருத்துவக் குழுவினர் விமானத்துக்குள் ஏறி, அந்த பயணியை பரிசோதித்தனர்.

ஆனால் அந்தப் பயணி மயங்கிய நிலையில் இருந்த அந்த பயணி ஏற்கனவே உயிரிழந்திருந்தார். இதை அடுத்து மாரடைப்பால் மலேசியா நாட்டு பயணி உயிரிழந்ததாக அறிவித்தனர். உடனே அவருடைய மனைவி விமானத்திற்குள் கதறி அழுதார். இதையடுத்து குடியுரிமை அதிகாரிகள், உயிரிழந்த மலேசிய பயணியின் உடலை சென்னையில் இறக்குவதற்கு அனுமதி கொடுத்தனர்.

அதோடு உயிரிழந்தவரின் மனைவிக்கும் தற்காலிக அவசரகால விசா வழங்கினர். இதையடுத்து உயிரிழந்தவரின் உடல் விமானத்திலிருந்து கீழே இறக்கப்பட்டது. அவருடைய மனைவியும் கீழே இறங்கினார். அதன்பின்பு சென்னை விமானநிலைய காவல்துறையினர் விரைந்து வந்து, உடலை கைப்பற்றி, குரோம்பேட்டை அரசு மருத்துவமனைக்கு உடற்கூராய்வுக்காக அனுப்பி வைத்தனர்.

அதன் பின்பு விமானம் சுமார் 3 மணி நேரம் தாமதமாக 270 பயணிகளுடன் மலேசிய தலைநகர் கோலாலம்பூர் புறப்பட்டு சென்றது. உயிரிழந்தவர் உடல், உடற்கூராய்வுக்கு பின்பு, பதப்படுத்தப்பட்டு, காா்கோ விமானம் மூலம் மலேசியா எடுத்து செல்லப்படும் என்று விமானநிலைய அதிகாரிகள் அறிவித்தனர்.

இதையும் படிங்க:தன்னை கடித்த பாம்புடன் சிகிச்சை பெற வந்த பெண் - மருத்துவர்கள் அதிர்ச்சி