அனைத்து நீதிபதிகள் கூட்டம் - பதிவாளருக்கு தலைமை நீதிபதி உத்தரவு

சென்னை: உயர் நீதிமன்றத்தின் செயல்பாடுகள் குறித்து விவாதிப்பதற்காக வரும் ஏப்ரல் 29ஆம் தேதி சென்னை உயர் நீதிமன்ற அனைத்து நீதிபதிகள் கூட்டத்தைக் கூட்டும்படி தலைமைப் பதிவாளருக்கு தலைமை நீதிபதி உத்தரவிட்டுள்ளார்.

சென்னை உயர் நீதிமன்றம், தமிழ்நாடு மற்றும் புதுச்சேரியில் உள்ள நீதிமன்றங்களுக்கு, ஒவ்வொரு ஆண்டும் மே ஒன்று முதல் 31ஆம் தேதி வரை கோடை விடுமுறை விடப்படுவது வழக்கம். ஆனால், கரோனா தடுப்பு நடவடிக்கை காரணமாக மார்ச் இறுதி வாரத்தில் அனைத்து நீதிமன்றங்களும் மூடப்பட்டு அவசர வழக்குகள் காணொலி மூலம் விசாரிக்கப்பட்டு வருகிறது.

இந்நிலையில், சென்னை உயர் நீதிமன்ற நிர்வாகக் குழு நீதிபதிகள் கூட்டத்தில் எடுத்த முடிவின் அடிப்படையில், மே மாத விடுமுறையை ஒத்தி வைப்பதாக முடிவு எடுக்கப்பட்டு, அனைத்து நீதிமன்றங்களும் முழுவீச்சில் செயல்படும் என அறிவிக்கப்பட்டது.

இதனையடுத்து, வழக்கறிஞர் சங்கங்கள், தமிழ்நாடு மற்றும் புதுச்சேரி பார் கவுன்சில் தலைவர் அமல்ராஜ் ஆகியோர் தலைமை நீதிபதி ஏ.பி. சாஹிக்கு எழுதிய கடிதத்தில், கீழமை நீதிமன்றங்களிலும் அவசர வழக்குகளை மட்டுமே விசாரிக்க கோரிக்கை வைத்திருந்தனர்.

இந்நிலையில், ஏப்ரல் 29ஆம் தேதி சென்னை உயர் நீதிமன்றத்தில் அனைத்து நீதிபதிகள் கூட்டத்தைக் கூட்டும்படி தலைமைப் பதிவாளருக்கு தலைமை நீதிபதி ஏ.பி. சாஹி உத்தரவிட்டுள்ளார்.

அனைத்து நீதிபதிகளும் அவரவர் வீட்டில் இருந்து காணொலிக் காட்சி மூலம் கலந்து கொள்வதற்கான ஏற்பாடுகளை செய்யவும், அதில் உத்தரவிட்டுள்ளார். இந்தக் கூட்டத்தில் உயர் நீதிமன்றம் மற்றும் கீழமை நீதிமன்றங்கள் ஆகியவற்றில் மே மாத கோடை விடுமுறை குறித்தும், நீதிமன்றங்கள் எவ்வாறு செயல்பட வேண்டும் என்பது குறித்தும் ஆலோசிக்கப்பட உள்ளது.

இதையும் படிங்க: எப்போதும் இல்லாத சித்திரை மாதம் - ஊரடங்கால் களை இழந்து காணப்படும் திருமண மண்டபங்கள்!