சமூக வலைதளங்களில் வைரலாகும் மோடி கேட்ட தோசை!

சென்னை: தமிழகம் வந்த பிரதமர் மோடிக்கு எதிராக தோசை கல்லில் கோ பேக் மோடி (GoBackModi) என்று மாவினால் எழுதப்பட்டிருந்த புகைப்படம் சமூக வலைதளங்களில் வைரலாகி வருகிறது.

திருப்பூரில் பல்வேறு நிகழ்ச்சிகளிலும், தேர்தல் பரப்புரை கூட்டத்திலும் கலந்து கொள்ள பிரதமர் நரேந்திர மோடி நேற்று (பிப்.10) தமிழகம் வந்தார். ஆனால் அவரது வருகைக்கு எதிராக நெட்டிசன்கள் வழக்கம் போல் #GoBackModi மற்றும் #GoBackSadistModi என்ற ஹேஷ்டேக்குகளை டிவிட்டரில் டிரெண்டாக்கி அதகளம் செய்தனர். மேலும், மதிமுக பொதுச்செயலாளர் வைகோ தலைமையில் திருப்பூரில் போராட்டமும் நடைபெற்றது.

இது இப்படி இருக்க மோடிக்கு எதிராக, திரும்பி போ மோடியே (Go Back Modi) என்று தோசைக்கல்லில் மாவினால் எழுதப்பட்ட புகைப்படம் ஒன்று சமூக வலைதளங்களில் வைரலாகி வருகிறது. அதுமட்டுமின்றி பல்லடம் - திருப்பூர் அரசு பேருந்திலும், ஊர் பெயர் பலகை வைக்கப்படும் இடத்திலும் GoBackModi என்ற பலகையை வைத்து தங்களது எதிர்ப்பை பதிவு செய்யப்பட்டிருந்தது.

கடந்த வருடம் (2018) மே மாதம் தமிழக பெண்களிடம் வீடியோ கான்ஃபெரன்ஸிங் மூலம் உரையாடிய மோடி ஒரு பெண்ணிடம், ”நான் தமிழகம் வந்தால் எனக்கு தோசை ஊத்தி கொடுப்பீர்களா?” என்று கேட்டிருந்தார் என்பது குறிப்பிடத்தக்கது.

தற்போது, இந்த Go Back Modi தோசை புகைப்படத்தை பகிர்ந்து, “நீங்கள் கேட்ட தோசை இதுதானா மோடி” என நெட்டிசன்கள் பங்கமாக கலாய்த்து வருகின்றனர். மேலும், கிடைக்கும் கேப்பில் (Gap) எல்லாம் மோடிக்கு ஆப்பு அடிக்கும் தமிழகம் எனவும் அவர்கள் பதிவு செய்து வருகின்றனர்.