கர்ப்பிணிகள் முதல் 16 வயதுடையோர் வரை வாரந்தோறும் புதன்கிழமை தடுப்பூசி

அக்டோபர் முதல் அனைத்து அரசு மருத்துவமனைகளிலும் கர்ப்பிணிகள் முதல் 16 வயது வரை செலுத்தப்படும் தடுப்பூசிகள், வாரம்தோறும் புதன்கிழமை போடப்படும் என்று மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்ரமணியன் தெரிவித்துள்ளார்.

சென்னை:பள்ளி மாணவர்களுக்கு காய்ச்சல் அதிகமாகப்பரவி வருவதால் சுகாதாரத்துறை அலுவலர்கள் கரோனா தடுப்பூசி வியாழக்கிழமைதோறும் போட செல்லும்போது, காய்ச்சல் குறித்தும் ஆய்வு செய்வார்கள் எனவும், தலைவர்கள் பொதுமக்களை பீதி அடையச்செய்யும் வகையில் பேட்டியோ, அறிக்கையோ அளிக்க வேண்டாம் எனவும் அமைச்சர் மா.சுப்பிரமணியன் தெரிவித்தார்.

பொது சுகாதாரத்துறை சார்பில் தமிழ்நாட்டில் 37ஆவது கோவிட் தடுப்பூசி முகாம் நடைபெற்று வருகிறது. சென்னை தியாகராயநகரில் உள்ள கோவிட் தடுப்பூசி சிறப்பு முகாமை மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன் ஆய்வு செய்தார்.

பின்னர் செய்தியாளர்களிடம் பேசிய அமைச்சர் மா.சுப்பிரமணியன், ”இந்தியாவிலேயே தமிழ்நாட்டில் தான் தொடர்ந்து தடுப்பூசி சிறப்பு முகாம் தொடர்ந்து நடத்தப்பட்டு வருகிறது. தமிழ்நாட்டில் மெகா தடுப்பூசி முகாம்கள் நடத்தப்பட்டு வருகின்றன. 5.38 கோடி பேருக்கு முகாம்கள் மூலம் தடுப்பூசி செலுத்தப்பட்டுள்ளன. தமிழ்நாட்டில் 96.50 விழுக்காடு பேர் முதல் தவணையும், 91.10 விழுக்காடு பேர் இரண்டாம் தவணை தடுப்பூசியும் செலுத்தியுள்ளனர்.

தடுப்பூசி முகாமில் ஆய்வு

அதேபோல், முன்னெச்சரிக்கை தடுப்பூசி 4.25 கோடி பேருக்கு இலக்கு நிர்ணயிக்கப்பட்டதில், 80,705 பேர் மட்டுமே முன்னெச்சரிக்கை தவணை தடுப்பூசியைச் செலுத்தியுள்ளனர். பூஸ்டர் டோஸ் செலுத்திக்கொள்வது அவசியமானது. தற்பொழுது கரோனா தொற்று 50ஆயிரம் முதல் 1லட்சம் வரையில் சில நாடுகளில் உறுதியாகிறது.

கேரளாவில் 2500-க்கும் மேற்பட்டோருக்கு நேற்று மட்டும் பாதிப்பு உறுதியாகியுள்ளது. தமிழ்நாட்டில் கரோனா தொற்று 450-க்கும் கீழ் தொடர்ந்து குறைந்துகொண்டு செல்லும் என எதிர்பார்த்த நிலையில், சென்னை, கோயம்புத்தூரில் தொற்று அதிகரித்து வருகிறது. எனவே 30ஆம் தேதிக்குள் பூஸ்டர் டோஸ் தடுப்பூசி இலவசமாக செலுத்தப்படும்.

அதனைப்பயன்படுத்தி மக்கள் இலவசமாக பூஸ்டர் டோஸ் செலுத்திக்கொள்ள வேண்டும். மக்கள் தயக்கம் காட்டாமல் விரைந்து தடுப்பூசி செலுத்திக்கொள்ள வேண்டும். சென்னையில் 99.12 விழுக்காடு பேர் முதல் தவணையும், 87.17 விழுக்காடு பேர் இரண்டாம் தவணை தடுப்பூசியும் சென்னையில் செலுத்தியுள்ளனர். மாநில அளவைவிட 4 விழுக்காடு குறைவாக உள்ளது. அதனை அதிகரித்து பாேடுவதற்கு நடவடிக்கை எடுக்கப்பட்டு வருகிறது.

தடுப்பூசி முகாமில் ஆய்வு

ஒன்றிய அரசு அக்டோபர் 1ஆம் தேதிக்கு பிறகு பூஸ்டர் தடுப்பூசி இலவசம் தொடருமா அல்லது தனியார் மருத்துவமனையில் கட்டணம் செலுத்த ஊசி போட்டுக் கொள்ள வேண்டுமா? என்பதை அறிவிக்கும். இது குறித்த தகவல் இன்னும் சில நாட்களில் தெரியவரும்.

தமிழ்நாட்டில் கர்ப்பிணிகள் முதல் 16 வயதுடையோர் வரை தடுப்பூசி போடுவதில் மாற்றம் செய்யப்பட்டுள்ளது. அனைத்து அரசு மருத்துவமனைகளிலும் தடுப்பூசிகள் புதன்கிழமைதோறும் போடப்படும். 2127 ஆரம்ப சுகாதார நிலையங்களில், 8713 துணை ஆரம்ப சுகாதார நிலையங்கள், சென்னையில் உள்ள 159 நகர்ப்புற சுகாதார நிலையங்களில், 292 வட்டார மருத்துவமனைகளிலும், 36 அரசு மருத்துவ கல்லூரி மருத்துவமனைகள் என மொத்தமாக 11,333 அரசு மருத்துவமனைகளில் அக்டோபர் முதல் ஒவ்வொரு புதன்கிழமையும் அனைத்து தடுப்பூசிகளும் செலுத்தப்படும்.

கர்ப்பிணித் தாய்மார்கள் முதல் 16 வயதுடையோர் வரையில் பிசிஜி, ஹெபடைட்டிஸ் பி, போலியோ,ஐபிவி, பெண்ட்வலண்ட், ஜப்பானிக் காய்ச்சல், ரோட்டா வைரஸ், தட்டம்மை ருபெல்லா, டிபிடி, பிசிவி, டிடி, கரோனா தடுப்பூசி உள்ளிட்ட 13 தடுப்பூசிகள் செலுத்தப்படும். மேலும் தமிழ்நாட்டில் 12 முதல் 14 வயது குழந்தைகளுக்கான கரோனா தடுப்பூசி வாரந்தோறும் பள்ளிகளில் விழாயக்கிழமை செலுத்தப்படும்.

அடுத்த வாரம் நடைபெறும் 38-ஆவது மெகா சிறப்பு தடுப்பூசி முகாம் கடைசி தடுப்பூசி முகாமாக இருக்க வாய்ப்பு. செப்டம்பர் 30ஆம் தேதியுடன் மெகா தடுப்பூசி முகாம் நிறைவு. அதன் பின் பூஸ்டர் டோஸ் தடுப்பூசிக்குச் சலுகை கிடைக்குமா என்பது தெரியவில்லை.

தமிழ்நாட்டில் 1044 பேர்கள் influenza காய்ச்சல் மூலம் பாதிக்கப்பட்டுள்ளனர். இந்தக் காய்ச்சல் பாதிக்கப்பட்ட குழந்தைகளை பள்ளிக்கு அனுப்பாமல் வீடுகளில் தனிமைப்படுத்தி வைத்துக்கொள்ள வேண்டும். மேலும் இருமலின்போது வரும் நீர் திவலைகளால் காய்ச்சல் பரவும் என்பதால், வீட்டில் இருக்கும்போது முகக்கவசம் அணிந்து கொள்வது நல்லது.

காய்ச்சல் பரவலுக்காக விடுமுறை வழங்க வேண்டுமானால், 365 நாட்களும் விடுமுறை வழங்கி குழந்தைகளை வீட்டிலேயே வைத்திருக்க வேண்டியது தான். இதனால் தலைவர்கள் அறிவிப்பு வெளியிடும் பொழுது ஆராய்ந்து வெளியிட வேண்டும்’ என்றார்.

மேலும் அடுத்த வாரம் முதல் சுகாதாரத்துறை அலுவலர்கள் கரோனா தடுப்பூசி செலுத்த செல்லும் போது தீவிரமாக ஆய்வு மேற்கொள்வார்கள் எனத்தெரிவித்தார்.

இதையும் படிங்க:கேரளாவில் தாய்ப்பால் வங்கி திட்டம்... மேலும் 2 மருத்துவமனைகளில் அறிமுகம்...