இன்றைய செய்திகள், நிகழ்வுகளின் தொகுப்பு #EtvBharatNewsToday

இன்றைய செய்திகள் மற்றும் நிகழ்வுகளின் தொகுப்பைக் காணலாம்.

மீனவர்களுக்கு எச்சரிக்கை

வெப்பச்சலனம் காரணமாக தமிழ்நாட்டில் 4 நாட்களுக்கு மழைக்கு வாய்ப்புள்ளதாக சென்னை வானிலை ஆய்வு மையம் தெரிவித்துள்ளது. அரபிக்கடல் பகுதிகளில் பலத்தக் காற்று வீசக்கூடும் என்பதால் மீனவர்கள் யாரும் மீன்பிடிக்கச் செல்ல வேண்டாம் என எச்சரிக்கை விடுக்கப்பட்டுள்ளது.

கூகுள், பேஸ்புக் நிறுவனங்களுக்கு சம்மன்

நாடாளுமன்ற தகவல் தொடர்பு நிலைக் குழுவின் இன்றைய ஆலோசனைக் கூட்டத்தில் பங்கேற்க கூகுள், பேஸ்புக் நிறுவனங்களுக்கு சம்மன் அனுப்புப்பட்டுள்ளது. இதில் கலந்துகொண்டு சமூக ஊடகங்களில் குடிமக்களின் பாதுகாப்பு உரிமைகள் தொடர்பாகவும், சமூக வலைதளங்களை, ஆன்லைன் செய்தித் தளங்களை தவறாக பயன்படுத்துவதை தடுப்பது எப்படி என்பது குறித்தும் தங்கள் கருத்துக்களைத் தெரிவிக்க வேண்டும் என அதில் குறிப்பிடப்பட்டுள்ளது.

ராகுல்காந்தி - நவ்ஜோத் சிங் சித்து சந்திப்பு

காங்கிரஸ் முன்னாள் தலைவர் ராகுல்காந்தியை பஞ்சாப் காங்கிரஸ் தலைவர் நவ்ஜோத் சிங் சித்து இன்று நேரில் சந்திக்கிறார். அடுத்த ஆண்டு பஞ்சாபில் நடைபெறவுள்ள சட்டப்பேரவைத் தேர்தலையொட்டி ஆம் ஆத்மி போன்ற எதிர்க்கட்சிகள் தேர்தல் பணிகளைத் தொடங்கிய நிலையில் இந்த சந்திப்பு நடைபெறவுள்ளது.

சதமடிக்கும் பெட்ரோல்

இந்தியாவில் கடந்த சில வாரங்களாகவே பெட்ரோல், டீசல் விலை தொடர்ந்து அதிகரித்துக்கொண்டேவருகிறது. பல மாநிலங்களில் பெட்ரோல் விலை சதமடித்துள்ளது. இன்றைய நிலவரப்படி சென்னையில் ஒரு லிட்டர் பெட்ரோல் 99.80 ரூபாய்க்கும், டீசல் 93.72 ரூபாய்க்கும் விற்பனை செய்யப்படுகிறது.

யூரோ கால்பந்து 2020

யூரோ கால்பந்து தொடரின் இன்றைய ஆட்டத்தில் இங்கிலாந்து, ஜெர்மனி அணிகள் மோதுகின்றன. இந்த ஆட்டம் இந்திய நேரப்படி காலை 9:30 மணிக்கு தொடங்குகிறது.

HBD ஹரீஷ் கல்யாண்

தாராள பிரபு, இஸ்பேட் ராஜாவும் இதய ராணியும் உள்ளிட்ட திரைப்படங்களில் நடித்துள்ள நடிகர் ஹரீஷ் கல்யாண் இன்று தனது 31ஆவது பிறந்தநாளை கொண்டாடுகிறார். அவருக்கு ரசிகர்கள் வாழ்த்து தெரிவித்து வருகின்றனர்.