விமானப்படையை போன்று அரசு ஊழியர்கள் கடமை செய்ய வேண்டும் - சென்னை உயர்நீதிமன்றம்

சென்னை: பாகிஸ்தானில் பயங்கரவாதிகள் முகாமை அழித்த விமானப் படையினரைப் போல, அரசு ஊழியர்களும் தைரியமாக கடமையாற்ற வேண்டும் என சென்னை உயர் நீதிமன்றம் அறிவுறுத்தியுள்ளது.

கோவை மாவட்டம், சுண்டக்காமுத்தூர் அரசு மருத்துவமனையில் ஆண் செவிலியராக பணியாற்றிய சீனிவாசன், வேலூர் கல்லாவி அரசு மருத்துவமனைக்கு மாற்றம் செய்யப்பட்டார். மூன்றரை வயது குழந்தை இருப்பதால் குடும்ப நலனைச் சுட்டிக்காட்டி, பணிமாற்ற உத்தரவை ரத்து செய்யக்கோரி சீனிவாசன் சென்னை உயர் நீதிமன்றத்தில் வழக்கு தொடர்ந்தார்.

இந்த வழக்கு நீதிபதி எஸ்.எம்.சுப்பிரமணியம் முன் விசாரணைக்கு வந்தபோது, நிர்வாக காரணங்களுக்காக சீனிவாசன் இடமாற்றம் செய்யப்பட்டுள்ளதாக அரசுத்தரப்பில் தெரிவிக்கப்பட்டது. இதை ஏற்று, நிர்வாக காரணங்களுக்காக பணிமாற்றம் செய்யும் போது, நீதிமன்றம் தலையிட முடியாது எனக் கூறி, மனுவை தள்ளுபடி செய்து உத்தரவிட்டார்.

மேலும், எந்த ஊரிலும் பணியாற்ற வேண்டும் என்ற பணி நிபந்தனையை ஏற்று பணியில் சேரும் போது, குழந்தை, வயதான பெற்றோர் என காரணங்களை கூறி பணி மாறுதலை எதிர்ப்போர் அரசு பணியை தேர்ந்தெடுக்க கூடாது என நீதிபதி தனது உத்தரவில் குறிப்பிட்டுள்ளார்.

அரசு ஊழியர்கள் அர்ப்பணிப்பு மனப்பான்மையுடன் பணியாற்ற அறிவுறுத்திய நீதிபதி, பாகிஸ்தானில் பயங்கரவாதிகள் முகாம்களை அழித்த விமானப் படையினரை போல, அரசு ஊழியர்கள் கடமையாற்ற வேண்டும் என வலியுறுத்தினார்.