சர்வப்பள்ளி ராதாகிருஷ்ணன் பேரனின் உடல் சென்னையில் நல்லடக்கம்

குடியரசு முன்னாள் தலைவர் சர்வப்பள்ளி ராதாகிருஷ்ணனின் பேரனும், மத்திய சுகாதாரத் துறை முன்னாள் செயலருமான கேசவ் தேசி ராஜு நேற்று (செப். 5) காலமான நிலையில், அவரது உடல் இன்று சென்னையில் நல்லடக்கம் செய்யப்பட்டது.

சென்னை:கேசவ் தேசி ராஜு இதய கோளாறு காரணமாக ஆழ்வார்பேட்டையில் உள்ள தனியார் மருத்துவமனையில் அனுமதிக்கப்பட்டிருந்தார். இதையடுத்து, அவர் மருத்துவம் பலனின்றி நேற்று அதிகாலை மரணமடைந்தார்.

இந்நிலையில், சென்னை ராயப்பேட்டையில் உள்ள அவரது இல்லத்திலிருந்து உடல் பெசன்ட்நகர் தகன மேடைக்கு இன்று காலை கொண்டுசெல்லப்பட்டது. அங்கு அவரது உடல் தகனம்செய்யப்பட்டது.

முக்கியப் பொறுப்புகள்

66 வயதான கேசவ் தேசி ராஜு, சென்னையில் பிறந்து, தொடக்கக் கல்வியை டேராடூனிலும், உயர் கல்வியை கேம்பிரிட்ஜ் பல்கலைக்கழகத்திலும் பயின்றார். இந்திய குடிமையியல் தேர்வில் தேர்ச்சிப்பெற்ற கேசவ், மத்திய சுகாதாரத் துறைச் செயலராகப் பதவி வகித்துள்ளார்.

மனநல சுகாதார சட்டம் கொண்டுவருவதற்கு காரணமாக இருந்தவர். மன சுகாதாரத் திட்ட நிலைக்குழுவில் கேசவ் உறுப்பினராக இருந்துள்ளார். மேலும், அடையாறு புற்றுநோய் மையத்தின் அறங்காவலர் குழு உறுப்பினராகவும் அவர் இருந்துள்ளார்.

அவர் எழுதிய புத்தகங்கள்

2018ஆம் ஆண்டு இவர் எழுதிய 'இந்திய சுகாதார அமைப்பின் ஊழல்' என்னும் புத்தகம் பெரும் அதிர்வலைகளை ஏற்படுத்தியது. அதுபோல, கர்நாடக இசையில் நாட்டம் கொண்ட கேசவ் எழுதிய எம்.எஸ். சுப்புலட்சுமி வாழ்க்கை வரலாறு புத்தகம் பலத்த வரவேற்பைப் பெற்றது என்பது குறிப்பிடத்தக்கது.