பொங்கல் பண்டிகையையொட்டி, ஏழை எளிய மக்களுக்கு 1 கோடியே 25 லட்சம் இலவச வேட்டி, சேலை உற்பத்தி செய்வதற்கான நூல்களை, தமிழ்நாடு கைத்தறி மற்றும் ஜவுளித் துறை கொள்முதல் செய்து, நெசவாளர் கூட்டுறவு சங்கங்களுக்கு வழங்கியுள்ளது.
இதில் ஒரு சேலைக்கு, 260 ரூபாய் கூலியாக வழங்கப்படுகிறது. இந்நிலையில், தரம் குறைந்த நூல்களை அதிக விலைக்கு கொள்முதல் செய்ததன் மூலம் 21 கோடியே 31 லட்சத்து 21 ஆயிரத்து 250 ரூபாய் அரசுக்கு இழப்பு ஏற்படுத்தி உள்ளதாகக் கூறி, திருப்பூரைச் சேர்ந்த முத்தூர் நெசவாளர் கூட்டுறவு சங்கத் தலைவர் கோவிந்தராஜ் சென்னை உயர் நீதிமன்றத்தில் மனு தாக்கல் செய்தார்.
அதில், தரம் குறைந்த நூல்களை நெய்வதற்கு வழங்கியதால், ஒரு நாளுக்கு 6 சேலைகள் நெய்யப்படும் நிலையில் 3 சேலைகளை மட்டுமே நெய்வதால் தங்கள் தொழிலுக்குப் பாதிப்பு ஏற்படுகிறது எனக் கூறியுள்ளார்.