இலங்கையிலிருந்து 15 தமிழ்நாடு மீனவர்கள் நாடு திரும்பினர்

இலங்கை சிறையிலிருந்து விடுதலையான ராமேஸ்வரம் மீனவர்கள் 15 போ் சென்னை வந்தடைந்தனர்.

ராமேஸ்வரத்தை சேர்ந்த 15 மீனவர்கள் ஜனவரி மாதம் 8ஆம் தேதி எல்லை தாண்டி மீன்பிடித்ததாக இலங்கை கடற்படையால் கைது செய்யப்பட்டனர். அவர்களது படகுகள், வலைகளை பறிமுதல் செய்யப்பட்டன. இந்த மீனவர்களை மீட்க நடவடிக்கை எடுக்குமாறு, அவர்களது உறவினர்கள் தமிழ்நாடு அரசுக்கு கோரிக்கை வைத்தனர். அதனடிப்படையில் தமிழ்நாடு அரசு, மத்திய அரசு வெளியுறவுத்துறை அமைச்சர் ஜெய்சங்கருக்கு மீனவர்களை மீட்க விரைந்து நடவடிக்கை எடுக்குமாறு வலியுறுத்தியது.

இதனிடையே 15 மீனவர்களையும் இலங்கை நீதிமன்றம் விடுதலை செய்தது. அனைவரும் இலங்கையில் உள்ள இந்திய தூதரக அலுவலர்களிடம் ஒப்படைக்கப்பட்டனர். அங்கு 14 நாள்கள் தனிமைப்படுத்தப்பட்டனர். இதையடுத்து மீனவர்களுக்கு எமர்ஜென்ஸி சர்டிபிகேட் கொடுக்கப்பட்டு, இலங்கையிலிருந்து சென்னைக்கு விமானம் மூலம் அனுப்பிவைக்கப்பட்டனர்.

நாடு திரும்பிய மீனவர்கள்:அதன்படி இன்று காலை மீனவர்கள் 15 பேரும் சென்னை விமானநிலையம் வந்தடைந்தனர். அவர்களுக்கு தமிழ்நாடு அரசு சார்பில் வரவேற்பு அளிக்கப்பட்டது. இதையடுத்து மீன்வளத்துறை ஏற்பாடு செய்திருந்த வாகனம் மூலம் சொந்த ஊருக்கு அனுப்பி வைக்கப்பட்டனர். இதனிடையே விமான நிலையத்தில் மீனவர்கள் கூறுகையில், இலங்கை கடற்படையால் சிறைபிடிக்கப்பட்ட எங்களது படகுகள் மற்றும் வலைகளை மத்திய, மாநில அரசுகள் பெற்று தர வேண்டும். இலங்கை கடற்படையின் தொடர் கைது நடவடிக்கைக்கு நிரந்தர தீர்வு கொண்டுவர வேண்டும் என்று கோரிக்கை வைத்தனர்.

இதையும் படிங்க:இது ஸ்டாலின் ஸ்டைல்... வைரல் வீடியோ...