கட்சிக்கொடி, பேனர் தயாரிப்புப் பணிகள்: தேர்தலால் வேலைவாய்ப்பு பெறும் தெலங்கானா மக்கள்!

தமிழ்நாடு உள்ளிட்ட தேர்தல் நடைபெறும் மாநிலங்களில் பரப்புரை தீவிரம் அடைந்துள்ள நிலையில், தெலங்கானா மாநிலம், சிரிசில்லாவில் கொடி, பேனர் உள்ளிட்ட பொருள்கள் தயாரிப்பில் தொழிலாளகள் ஈடுபட்டுள்ளனர்.

தமிழ்நாடு, கேரளா, அசாம், மேற்கு வங்காளம், புதுச்சேரியில் சட்டப்பேரவைத் தேர்தலுக்கான பரப்புரை தீவிரம் அடைந்துள்ளது. இந்நிலையில், தேர்தல் காலங்களில் அதிகம் புழக்கத்தில் இருக்கும் கட்சிக்கொடி, பதாகைகள், துண்டுகள் உள்ளிட்டவை தயாரிப்பில் தெலங்கானா மாநிலம், சிரிசில்லா நெசவாளர்கள் தீவிரமாக ஈடுபட்டு வருகின்றனர். அதுகுறித்த செய்தித் தொகுப்பைக் காணலாம்:

தெலங்கானா மாநிலம், ராஜன்னா சிரிசில்லா மாவட்டம், சிரிசில்லா நகரில் நெசவு மற்றும் பீடி சுற்றும் தொழிலை நம்பி எண்ணற்ற குடும்பங்கள் உள்ளன. ஆண்கள் ஜவுளித் தொழிலில் பணியாற்றும் அதே வேளையில், பெண்கள் பீடி சுற்றும் பணியில் ஈடுபட்டு வருமானம் ஈட்டி வருகின்றனர்.

சட்டப்பேரவைத் தேர்தல் நடைபெறும் மாநிலங்களின் பல்வேறு கட்சிகளிடமிருந்து அதிக எண்ணிக்கையிலான ஆர்டர்கள் கிடைப்பதால், இங்குள்ள தொழிலாளர்கள் வேலைவாய்ப்பைப் பெறுவதோடு, வழக்கமாகக் கிடைக்கும் வருமானத்தைவிட கூடுதல் ஊதியத்தையும் பெற்று உற்சாகத்துடன் பணிபுரிந்து வருகின்றனர்.

தேர்தல் பரப்புரை பொருள்கள் தயாரிப்பில் பயன்படுத்த வேண்டிய பாலியஸ்டர் துணிப்பொருள் தயாரிப்பில் சுமார் 10 ஆயிரம் நெசவாளர்கள் ஈடுபட்டுள்ளனர். இதற்காக 27 ஆயிரம் தறிகள் செயல்பட்டு வருகின்றன. கட்சிக்கொடிகள், துண்டுகளுக்கான ஆர்டரும் ஆன்லைன் மூலம் நடைபெறுகிறது.

கொடிகள், பதாகைகள் உள்ளிட்டவை மலிவான பொருள்கள் என்பதால், வாக்குப்பதிவு நடைபெறும் பகுதிகளில் உள்ள முகவர்கள், வணிகர்களுக்கு நேரடியாக ஆர்டர்களை வழங்குகிறார்கள். கொடிகள் நான்கு ரூபாய் முதல் 30 ரூபாய் வரையும், துண்டு 30 ரூபாய் முதல் 50 ரூபாய் வரையும் விற்பனை செய்யப்படுகிறது.

ஃபேன்ஸி, டிசைனர் ஸ்கார்ஃபின் விலை சற்றே அதிகம். ஆர்டர்களை முன்கூட்டியே எடுப்பதால் அப்போதே விலையும் தீர்மானிக்கப்படுகிறது.

இதற்கு முன் பீடித் தொழிலை மேற்கொண்டிருந்த தொழிலாளர்களுக்கு 1,500 ரூபாய் முதல் 2,000 ரூபாய் வரை மாத வருமானம் கிடைக்கும். தேர்தல் பரப்புரை பொருள்கள் உற்பத்தி தொடங்கிய நிலையில், அதே தொழிலாளர்கள் மாதத்திற்கு 6,000 ரூபாய் முதல் 9,000 ரூபாய் வரை வருமானம் ஈட்டுகின்றனர். தேர்தலால் ஆயிரத்திற்கும் மேற்பட்ட தொழிலாளர்கள் நேரடியாகவும், 500க்கும் அதிகமான பெண்கள் மறைமுகமாகவும் பயனடைகிறார்கள்.

கடந்த 2014ஆம் ஆண்டு தமிழ்நாட்டில் நடைபெற்ற தேர்தலின்போது சுமார் ஒரு கோடி கைத்தறி புடவைகள் தயாரிக்க ஆர்டர்கள் கிடைத்தன. படுகம்மா புடவை தயாரிப்பில் பிசியாக இருக்கும் நெசவாளர்களுக்கு, இதுபோன்ற தேர்தல்கள் வேலை வாய்ப்பை வழங்குகிறது என்றால் அது மிகையில்லை.