குடியுரிமை திருத்தச் சட்டத்திற்கு எதிராக திமுக மற்றும் அதன் தோழமைக் கட்சியினர் சார்பில் கையெழுத்து இயக்கம் தொடங்கப்பட்டு நடைபெற்றுவருகிறது. காஞ்சிபுரம் வடக்கு மாவட்ட திமுக சார்பில் கோவளம் பேருந்து நிலையம் அருகே குடியுரிமை திருத்தச் சட்டத்திற்கு எதிராக கையெழுத்து இயக்கம் இன்று நடத்தப்பட்டது. இந்நிகழ்ச்சியில் கலந்துகொண்ட திமுக தலைவர் மு.க. ஸ்டாலின் பொதுமக்களைச் சந்தித்துக் குடியுரிமை திருத்தச் சட்டம் குறித்து விளக்கமளித்தார். பின்னர், அவர்களிடம் குடியுரிமை திருத்தச் சட்டத்திற்கு எதிராக கையெழுத்தையும் பெற்றார்.
அதனைத் தொடர்ந்து செய்தியாளர்களைச் சந்தித்துப் பேசிய மு.க. ஸ்டாலின், ”மாணவர்கள் ஆராய்ந்து, சிந்தித்துப் போராட வேண்டும் என நடிகர் ரஜினிகாந்த் கருத்து தெரிவித்திருக்கிறார். முதலில் ரஜினிகாந்த் இந்த சட்டத்திருத்தத்தால் என்ன மாதிரியான பாதிப்புகள் ஏற்படும் என ஆராய்ந்து, சிந்தித்துப் பதிலளித்திருக்க வேண்டும். இச்சட்டத்தினால் பாதிப்புகள் ஏற்படும் என்பதை அவர் உணர்ந்தால், ஒருவேளை அவர் கூறிய கருத்தை மாற்றிச் சொல்லுவார் என நம்புகிறேன்” எனத் தெரிவித்தார்.