விழுப்புரம் மத்திய மாவட்ட திமுக சார்பில் 2021 சட்டப்பேரவைத் தேர்தலுக்கான தமிழகம் மீட்போம் சிறப்பு பொதுக்கூட்டம் மற்றும் கட்சி முன்னோடிகளுக்கு பொற்கிழி வழங்கும் நிகழ்ச்சி, கலைஞர் அறிவாலயத்தில் இன்று நடைபெற்றது. இதில் அக்கட்சியின் தலைவர் மு.க.ஸ்டாலின் காணொலி மூலமாக கலந்து கொண்டு உரை நிகழ்த்தினார்.
அப்போது பேசிய அவர், " நான் திமுக தலைவராக தேர்ந்தெடுக்கப்பட்ட பின் கலந்து கொண்ட முதல் கூட்டம் விழுப்புரத்தில் தான் நடந்தது. நான் தொடர்ந்து பிற்படுத்தப்பட்ட மக்களுக்காக கடுமையாக உழைத்து வருகிறேன். வன்னியர்களுக்கு 20% இட ஒதுக்கீடு வழங்கியது திமுகதான். எடப்பாடி பழனிசாமிக்கு எந்த சமூகத்தின் மீதும் அக்கறை இல்லை. வேளாண் சட்டத்திருத்த மசோதாவை ஆதரித்தவர்தான் பழனிசாமி. அவர் பச்சைத்துண்டு போட்டு மக்களை ஏமாற்றி வருகிறார். அவர் பச்சைத்துண்டு பழனிசாமி அல்ல; பச்சை துரோக பழனிசாமி.
முதலமைச்சரிலிருந்து, அமைச்சர்கள் வரை கொள்ளையடிக்கவே வந்துள்ளனர். நீட் தேர்வு, 7 பேர் விடுதலை விவகாரம், ஜெயலலிதா மரணம் குறித்த வழக்குகளில் தீர்வு பெற்று தராதது சட்டத்துறை அமைச்சர் சி.வி.சண்முகம் செய்த துரோகம்.