சமீபத்தில், மத்திய அமைச்சர் அமித் ஷா இந்தி திணிப்பு குறித்து மீண்டும் சர்ச்சைகளை ஏற்படுத்தும் விதமாக "ஆங்கிலத்துக்கு பதிலாக இந்தியை பயன்படுத்துங்கள்" என்று கூறியுள்ளார். நாடாளுமன்றத்தின் 37ஆவது அலுவல் மொழிக் கூட்டம் கடந்த ஏப்.7ஆம் தேதி, டெல்லியில் நடைபெற்றது. இந்த கூட்டத்திற்கு மத்திய உள்துறை அமைச்சர் அமித் ஷா தலைமை தாங்கினார்.
அப்போது அமித் ஷா, "ஆட்சி மொழியே அலுவல் மொழி என்று பிரதமர் மோடி முடிவு செய்துள்ளார். இந்த முடிவு இந்தி மொழியின் முக்கியத்துவத்தை அதிகரிக்கும். ஆங்கில மொழிக்கு மாற்றாக, இந்தி மொழியை ஏற்றுக்கொள்ள வேண்டும். இந்தி மொழி மூலம் நாட்டின் ஒருமைப்பாட்டை காக்கலாம்" என்று கூறினார். இவரது கருத்துக்கு பல்வேறு தரப்பினர் கண்டனங்களைத் தெரிவித்து வருகின்றனர். தமிழ்நாட்டு மக்களும் சமூக வலைதளங்களில் கண்டனங்களைப் பதிவு செய்துவருகின்றனர்.
தமிழர்களுக்கு அறிவுரை:இந்நிலையில், தமிழ் திரைப்பட இயக்குநரும், நடிகருமான தங்கர் பச்சான், தமிழ் மொழியினை தமிழ் பேசும் மக்களாகிய நாம் மெல்ல மெல்ல படர்ந்து வரும் அந்நிய ஆங்கில மொழியின் தாக்கத்திற்கு ஆட்பட்டுள்ளதை உணர்த்தும் விதமாக 'தமிழ்தான் எங்கள் உயிர்' என்கிற தலைப்பில் நேற்று (ஏப்.10) ஒரு அறிக்கை ஒன்றை வெளியிட்டுள்ளார்.
அந்த அறிக்கையில், 'இந்தி திணிப்பின்போது, இணையத்தளங்களில் மட்டும்தான் தமிழர்கள் தங்களின் தமிழ்ப்பற்றினை பறைசாற்றிக்கொள்வோம். தமிழில் கல்வி வேண்டாம், ஆலயங்களில் தமிழ் வேண்டாம், நீதிமன்றங்களில் தமிழ் வேண்டாம், திருமண அழைப்பிதழ்களில் தமிழ் வேண்டாம், நாளேடுகளில் தமிழ் வேண்டாம், வீட்டுக்குள்ளேயே தமிழ் வேண்டாம், பொது இடங்களில் தமிழ் வேண்டாம், கடைகள், வணிக நிறுவனங்கள் என எங்கும் எதிலும் தமிழ் வேண்டாம். ஆனால் தமிழ் தான் எங்கள் உயிர் என கூறிக்கொள்வோம்.