ராமதாஸ், அன்புமணி மீதான வழக்குகள் தள்ளுபடி!

பாமக நிறுவனர் ராமதாஸ், தலைவர் அன்புமணி உள்ளிட்டோர் மீது தொடரப்பட்ட வழக்குகளை ரத்து செய்து சென்னை உயர்நீதிமன்றம் தீர்ப்பளித்துள்ளது.

சென்னை: கடந்த 2012, 2013ஆம் ஆண்டுகளில் மகாபலிபுரத்தில் வன்னியர் இளைஞர் பெருவிழா மாநாடுகள் நடைபெற்றன.அப்போது, பொது அமைதிக்கு குந்தகம் விளைவிக்கும் வகையில் இரவு 10 மணிக்கு மேல் கூட்டம் நடத்தியதாக பாமக நிறுவனர் ராமதாஸ், அப்போதைய பாமக இளைஞரணி தலைவரும், தற்போதைய தலைவருமான அன்புமணி ராமதாஸ், அப்போதைய தலைவர் ஜிகே மணி, முன்னாள் மத்திய இணை அமைச்சர் ஏகே மூர்த்தி, திருக்கச்சூர் ஆறுமுகம் ஆகியோர் மீது மகாபலிபுரம் போலீசார் வழக்குப்பதிவு செய்திருந்தனர்.

இந்த வழக்குகளை ரத்து செய்யக்கோரி பாமக நிறுவனர் ராமதாஸ் சார்பில் சென்னை உயர் நீதிமன்றத்தில் வழக்கு தொடரப்பட்டது. இந்த வழக்குகள் சென்னை உயர்நீதிமன்ற நீதிபதி நிர்மல் குமார் முன்பு விசாரணையில் இருந்தது.

அப்போது, பாமக சார்பில் ஆஜரான வழக்கறிஞர் கே.பாலு, இந்த வழக்குகள் அரசியல் உள்நோக்கத்தோடு தொடரப்பட்ட வழக்குகள் என்றும், வழக்குகள் தொடர உரிய சட்ட விதிகள் பின்பற்றப்படவில்லை எனவும் தெரிவித்தார். மேலும், இவ்வழக்குகளை ரத்து செய்ய வேண்டும் எனவும் வாதிட்டார்.

இந்த வழக்கில், தீர்ப்பை ஒத்தி வைத்திருந்த நீதிபதி நிர்மல் குமார் இன்று (ஜூலை 9) வழங்கியுள்ள தீர்ப்பில், பாமக நிறுவனர் ராமதாஸ், தலைவர் அன்புமணி ராமதாஸ் உள்ளிட்ட நிர்வாகிகள் மீது தொடரப்பட்ட இரண்டு வழக்குகளையும் ரத்து செய்து உத்தரவிட்டுள்ளார்.

இதையும் படிங்க:9 மணிக்கு தீர்ப்பு.. 9.15 க்கு பொதுக்குழு? - எதிர்பார்ப்புகளை கிளப்பியுள்ள அதிமுக பொதுக்குழு விவாதங்கள்!