மாற்றுத்திறனாளிகளுக்கான திறன்பேசிகள்! அரசின் புதிய திட்டம் தொடக்கம்!

சென்னை: தக்க செயலிகளுடன் கூடிய 10,000 திறன்பேசிகளை பார்வையற்ற மற்றும் கேட்கும் திறனற்ற மாற்றுத்திறனாளிகளுக்கு வழங்கும் திட்டத்தை முதலமைச்சர் எடப்பாடி பழனிசாமி இன்று தொடங்கி வைத்தார்.

தலைமைச் செயலகத்தில் இன்று மாற்றுத்திறனாளிகள் நலத்துறை சார்பில், தசைச்சிதைவு நோயால் பாதிக்கப்பட்டவர்களுக்கு சேலம், திருவண்ணாமலை, திண்டுக்கல், விருதுநகர், தஞ்சாவூர், தூத்துக்குடி, விழுப்புரம், தருமபுரி, திருச்சிராப்பள்ளி மற்றும் கோயம்புத்தூர் ஆகிய மாவட்டங்களில் அமைக்கப்பட்டுள்ள 10 பகல் நேர பராமரிப்பு மையங்களை முதலமைச்சர் பழனிசாமி திறந்து வைத்தார்.

மேலும், 10 கோடி ரூபாய் செலவில் பிறருடன் எளிதில் தொடர்பு கொள்ளும் வகையில், தக்க செயலிகளுடன் கூடிய 10,000 திறன்பேசிகளை (Smart phones with Apps) பார்வையற்ற மற்றும் கேட்கும் திறனற்ற மாற்றுத்திறனாளிகளுக்கு வழங்கும் திட்டத்தையும் அவர் தொடங்கி வைத்தார்.

தொடர்ந்து, மாற்றுத்திறனாளிகள் நலனுக்காக அரும்பணியாற்றியதற்காக, 2018 ஆம் ஆண்டிற்கான விருதை அப்போதைய ஈரோடு மாவட்ட ஆட்சித் தலைவர் பிரபாகர், 2019 ஆம் ஆண்டிற்கான விருதை அப்போதைய சிவகங்கை மாவட்ட ஆட்சியர் ஜெயகாந்தன், 2020 ஆம் ஆண்டிற்கான விருதை அப்போதைய தூத்துக்குடி மாவட்ட ஆட்சித் தலைவர் சந்தீப் நந்தூரி ஆகியோருக்கு முதலமைச்சர் வழங்கி சிறப்பித்தார்.

இந்நிகழ்ச்சியில், துணை முதலமைச்சர் ஓ. பன்னீர்செல்வம், அமைச்சர்கள், தலைமைச் செயலாளர் சண்முகம் மற்றும் அரசு உயர் அலுவலர்கள் கலந்து கொண்டனர்.

இதையும் படிங்க:7.5% இடஒதுக்கீடு: முதலமைச்சருக்கு நன்றி தெரிவித்த அரசு பள்ளி மாணவர்கள்!