முழு ஊரடங்கு: வெளியே சுற்றுபவர்கள் மீது வழக்கு!

இன்று(மே24) முதல் தளர்வுகள் இல்லாத முழு ஊரடங்கு அமல்படுத்தப்படுகிறது. இதற்கான கண்காணிப்பு பணிகளில் சென்னையில் 20 ஆயிரம் காவலர்கள் ஈடுபடுவர் என்றும், அத்துமீறி வீட்டை விட்டு வெளியே வருபவர்கள் மீது வழக்குப்பதிவு செய்து கடும் நடவடிக்கை எடுக்கப்படும் என்றும் சென்னை காவல் ஆணையர் சங்கர் ஜிவால் தெரிவித்துள்ளார்.

சென்னை: தளர்வுகள் இல்லாத முழு ஊரடங்கு காரணமாக சென்னையில் காவல்துறையினர் விரிவான கண்காணிப்பு ஏற்பாடுகள் செய்ய உள்ளனர்.

சென்னை முழுவதும் 20 ஆயிரம் காவலர்கள் பாதுகாப்புப் பணியிலும், கண்காணிப்பு பணியிலும் ஈடுபடுத்தப்பட உள்ளனர். 320 சோதனைச் சாவடிகள் அமைக்கப்பட்டு, வாகனத் தணிக்கையை தீவிரப்படுத்த உள்ளனர். இணைப்பு சாலைகள், சிறிய சாலைகள் மூடப்பட உள்ளன. மேம்பாலங்கள் மூடப்படுகிறன.

மக்கள் குடியிருப்புகளுக்கு சென்று காய்கறிகள், பழங்கள் விற்பனை செய்ய அரசு ஏற்பாடுகள் செய்துள்ளது. அந்த சமயத்தில் விற்பனையின் போது பொதுமக்கள் அதிகளவில் கூடுவதை தடுக்க, ரோந்து காவல் துறையினர் கண்காணிப்பை தீவிரப்படுத்த, சென்னை காவல்துறை திட்டமிட்டுள்ளது. சந்தைப் பகுதிகளில் காவல்துறையினரின் ரோந்து பணி தீவிரப்படுத்தப்பட உள்ளது.

ஊரடங்கு கட்டுப்பாட்டை மீறி யாரும் வெளியே வரக் கூடாது. அத்துமீறி வரும் வாகனங்கள் பறிமுதல் செய்யப்பட்டு வழக்குப்பதிவு செய்யப்படும். வாகனங்கள் உடனே திரும்பி கொடுக்கப்படமாட்டாது. குறிப்பாக கடந்த ஒரு வாரத்திற்கு முன்பு பறிமுதல் செய்யப்பட்ட வாகனங்கள் படிப்படியாக உரியவர்களிடம் ஒப்படைக்க உத்தரவிடப்பட்டுள்ளது.

ஆனால், ஒரே வாகனம் மீண்டும் பறிமுதல் செய்யப்பட்டால், அந்த வாகனம் திரும்ப ஒப்படைக்கப்படாது என்றும், வாகன உரிமையாளர் நீதிமன்றம் மூலமாக தனது வாகனத்தைப் பெற்றுக் கொள்ளவேண்டும் என்றும் சென்னை காவல்துறை எச்சரிக்கை விடுத்துள்ளது.

"பொதுமக்கள் அரசின் முழு ஊரடங்கு வழிகாட்டுதல் நெறிமுறைகளைக் கடைபிடிக்க வேண்டும். யாரும் வீட்டை விட்டு வெளியே வரவேண்டாம். காய்கறிகள் வீடு தேடி வந்து வழங்க ஏற்பாடு செய்யப்பட்டுள்ளது. ஊரடங்கில் அத்துமீறி வருபவர்கள் மீது வழக்குப்பதிவு செய்து நடவடிக்கை எடுக்கப்படும்" என்று சென்னை காவல் ஆணையர் சங்கர் ஜிவால் எச்சரிக்கை விடுத்துள்ளார்.

கரோனா தொற்றை தடுக்க சென்னை காவல்துறைக்கு பொதுமக்கள் ஒத்துழைப்பு வழங்க வேண்டும் என்றும் அவர் கேட்டுக் கொண்டுள்ளார்.

தலைநகரில் முழு ஊரடங்கை மீறியதாக மே 14ஆம் தேதி முதல் மே 22 வரையிலான 9 நாட்களில் 30,235 வழக்குகள் பதிவு செய்யப்பட்டு; 33,641 வாகனங்கள் பறிமுதல் செய்யப்பட்டுள்ளன என்பது குறிப்பிடத்தக்கது.