சட்டம்ஒழுங்கு பிரச்சினை ஏற்படாமல் நடவடிக்கை எடுக்க சென்னை ஆணையர் உத்தரவு!

சென்னை: தொடர் மழை காரணமாக செம்பரம்பாக்கம் ஏரியில் உபரிநீர் வெளியேற்றப்படும் நிலை ஏற்படவிருப்பதால் அப்பகுதியில் சட்டம்ஒழுங்கு பிரச்சினை ஏற்படாத வண்ணம் நடவடிக்கை எடுக்குமாறு சென்னை காவல் ஆணையர் அறிவுறுத்தியுள்ளார்.

சென்னை குன்றத்தூர் காவல் மாவட்டத்திற்குட்பட்ட பகுதியில் செம்பரம்பாக்கம் ஏரி அமைந்துள்ளது. இதன் மொத்த கொள்ளளவு 24 அடி. நேற்றைய நிலையைப் பொறுத்தவரையில் 21 அடியை எட்டவிருப்பதாகத் தெரியவந்துள்ளது. 22 அடியை எட்டும் பொழுது செம்பரம்பாக்கம் ஏரியின் ஐந்து கண் பகுதியிலும், 19 கண் மதகுகள் பகுதியிலும் உபரி நீர் வெளியேற்றப்படும் என தெரிவிக்கப்பட்டுள்ளது.

உபரி நீர் வெளியாகும்போது சென்னை அடையாறு ஆற்றின் கரையோரம் உள்ள பகுதியில் வசிக்கும் மக்கள், குறிப்பாக திருநீர்மலை, வழுதவம்பேடு, குன்றத்தூர், நத்தம் திருமுடிவாக்கம், சிறுகளத்தூர், மணப்பாக்கம் ஆகிய பகுதிகளில் வெள்ள அபாயம் ஏற்பட வாய்ப்புள்ளது.

எனவே நிலைமையைக் கூர்ந்து கண்காணித்து அம்பத்தூர், புனித தோமையர் மலை மாவட்ட காவல் துணை ஆணையர்கள், மேற்கு மண்டல இணை ஆணையர், வடக்கு, தெற்கு கூடுதல் ஆணையர்கள் சட்ட ஒழுங்கு பிரச்னை ஏற்படாமல் இருக்க முன்னெச்சரிக்கை நடவடிக்கை எடுக்குமாறு சென்னை காவல் ஆணையர் மகேஷ்குமார் அகர்வால் அறிவுறுத்தியுள்ளார்.

2015ஆம் ஆண்டு செம்பரம்பாக்கம் ஏரி கொள்ளளவு எட்டிவுடன் எந்தவித முன்னறிவிப்புமின்றி திறந்து விட்டதால் அடையாறு ஆற்றின் கரையோர மக்கள் வெள்ளத்தால் பாதிக்கப்பட்டதாக என குற்றச்சாட்டு எழுந்தது. மீண்டும் இந்த நிலை ஏற்படாமல் இருக்க முன்னெச்சரிக்கை நடவடிக்கை எடுக்க காவல் ஆணையர் உத்தரவிட்டுள்ளார்.