ஆதரவற்ற மக்களுக்காக தொடங்கப்பட்ட "காவல் கரங்கள்"

சென்னை: தன்னார்வலர்கள் மற்றும் சென்னை பெருநகர காவல்துறை அடங்கிய கூகுள் தளத்தில் ஆதரவற்றோர் விவரங்கள் பதிவு செய்யப்பட்டு உதவி செய்ய நடவடிக்கை எடுக்கப்படும் என காவல் ஆணையர் மகேஷ் குமார் அகர்வால் தெரிவித்துள்ளார்.

சென்னையில் ஆதரவற்ற நிலையில் சாலையோரம் வசிப்போர் மற்றும் முதியோர்களின் நலன் காக்கும் பொருட்டு சென்னை காவல்துறை சார்பில் "காவல் கரங்கள்" என்ற புதிய திட்டம் தொடங்கப்பட்டுள்ளது. சென்னை எழும்பூர் ராஜரத்தினம் மைதானத்தில் இத்திட்டத்தினை சென்னை காவல் ஆணையர் மகேஷ் குமார் அகர்வால் தொடங்கி வைத்தார். மேலும், காவல் கரங்கள் பற்றிய குறும்படத்தினையும், கரோனாவும், காவல்துறையும் என்ற யூடியூப்(YouTube) குறும்படத்தினையும் காவல் ஆணையர் இந்நிகழ்ச்சியின் வாயிலாக வெளியிட்டார்.

இதுகுறித்து அவர் கூறியதாவது;

காவல் கட்டுப்பாட்டு அறையின் கீழ் செயல்படும் இந்த திட்டத்தில் ரோந்துப்பணியில் ஈடுபட்டு வரும் சுமார் 700 ரோந்து வாகனங்கள் செயல்படவுள்ளன. இந்த திட்டத்தின் வாயிலாக சாலையோரங்களில் ஆதரவன்றி இருக்கும் நபர்கள் மற்றும் முதியோர்களை மீட்டு அவர்களுக்கு மருத்துவ உதவிகள் அளித்து, உண்ண உணவும், இருப்பிடமும் இல்லாமல் இருப்பவர்களை காப்பகங்களில் சேர்க்க தன்னார்வத் தொண்டு நிறுவனங்களுடன் ஒருங்கிணைந்து காவல்துறை செயல்படவுள்ளது. இந்த திட்டத்தின் வாயிலாக அரசு தொண்டு நிறுவனங்கள், முதியோர், பெண்கள், சிறுவர்களுக்கான உதவும் காப்பகங்களின் உதவியைப் பெற தொலைபேசி எண்கள் அடங்கிய கையேடும் காவல்துறை சார்பில் வெளியிடப்பட்டுள்ளது.

அதுமட்டுமல்லாமல் இந்த சேவையில் ஈடுபடவுள்ள 12 தன்னார்வ தொண்டர்களுக்கு சேவை பயன்பாட்டிற்காக 12 எலக்டிரானிக் டேப்லட்களை காவல் ஆணையர் இந்நிகழ்ச்சியின்போது வழங்கினார். இந்நிகழ்ச்சியில் பேசிய காவல் ஆணையர், சாலைகளில் உள்ள ஆதரவற்ற முதியோர், பெண்கள் மற்றும் சிறுவர்கள் குறித்து சென்னை பெருநகர காவலில் இயங்கி வரும் முதியோர் உதவி மைய எண் 1253, பெண்கள் உதவி மைய எண் 1091, சிறுவர் உதவி மைய எண் 1098 மற்றும் காவல் கட்டுப்பாட்டறை எண் 100 ஆகியவற்றில் வரும் தகவல்கள் காவல் உதவி மையம் மூலம் பெறப்பட்டு ரோந்து வாகனத்திற்கு தகவல் கொடுக்கப்படும்.

மேலும், கண்டறியப்பட்ட இடத்திற்கு சென்று அவர்களுக்கு உதவிடவும், உறவுகளால் கைவிடப்பட்ட நபர்களை அவர்களது உறவினர்களிடம் சேர்க்கவும், உறவுகள் அல்லாத ஆதரவற்ற நிலையில் உள்ளவர்களை அரசு மற்றும் தனியார் தொண்டு இல்லங்களில் சேர்த்து, தங்கும் வசதி ஏற்படுத்திக் கொடுத்திடவும் ஏற்பாடு செய்யப்படும்.

கடந்த மார்ச் 15 ஆம் தேதி முதல் ஒருங்கிணைக்கப்பட்டு நடத்தப்பட்டு வருகின்ற இந்த சேவையினால் இதுவரை 138 ஆதரவற்றோர் மீட்கப்பட்டு உரிய உதவிகள் செய்யப்பட்டுள்ளது. மேலும் காவல்துறையினர் மற்றும் தன்னார்வலர்கள், தொண்டு நிறுவனங்கள் அடங்கிய கூகுள் தளம் மற்றும் வாட்ஸ் ஆப் குழு உருவாக்கப்பட்டு தகவல் பரிமாறப்படும். அதன் மூலம் தேவைப்படுவோருக்கு உரிய நேரத்தில் உதவி கிடைக்க நடவடிக்கை எடுக்கப்படும் என்றும் அவர் தெரிவித்தார்.

தொடர்ந்து செய்தியாளர்களிடம் பேசிய காவல் ஆணையர், இரவு நேர ஊரடங்கு தொடர்பாக பொதுமக்கள் மத்தியில் நல்ல விழிப்புணர்வு இருந்ததால் நல்ல ஒத்துழைப்பு நல்கினார்கள் என்றார். சோதனையின் போது சுமார் 20 வாகனங்கள் பறிமுதல் செய்யப்பட்டது, முதல் நாள் என்பதால் அனைவரும் எச்சரித்து அனுப்பபட்டனர் என்றார்.