சுதந்திர தின விழாவை முன்னிட்டு விமான நிலையத்திற்கு பாதுகாப்பு அதிகரிப்பு

சென்னை: சுதந்திர தினத்தை முன்னிட்டு மீனம்பாக்கம் விமான நிலையத்தில் இன்று முதல் வருகிற 31ஆம் தேதி நள்ளிரவு வரை பாதுகாப்பு ஏற்பாடுகள் அதிகரிக்கப்பட்டுள்ளதாக விமான நிலைய ஆணையகம் அறிவித்துள்ளது.

சுதந்திர தினத்தை முன்னிட்டு சென்னை விமான நிலையத்தில் பாதுகாப்பு பலப்படுத்தப்பட்டுள்ளது. உள்நாட்டு விமான முனையத்திற்குப் பயணிகள் ஒன்றரை மணி நேரம் முன்னதாகவும், பன்னாட்டு விமான முனையத்திற்கு, பயணிகள் மூன்று மணி நேரம் முன்னதாகவும் வர வேண்டும்.

திரவப் பொருட்கள், அல்வா, ஊறுகாய், ஜாம் போன்றவைகள் எடுத்துச் செல்லாமல் தவிர்க்க வேண்டும். விமான நிலையத்தில் காா் பாா்க்கிங், பயணிகள் பாதுகாப்பு சோதனை பகுதிகள், விமானங்களுக்கு எரிபொருள் நிரப்பும் பகுதி, சரக்கு பாா்சல்கள் பகுதிகளில் கூடுதல் பாதுகாப்பு மற்றும் கண்காணிப்பு ஏற்பாடுகள் செய்யப்பட்டு உள்ளன.

துப்பாக்கி ஏந்திய காவல்துறையினர் பாதுகாப்புப் பணிகளில் ஈடுபடுத்தப்படுகின்றனர். விமான நிலையங்களுக்கு வரும் வாகனங்களில் சந்தேகத்திற்கிடமான வாகனங்களை, நுழைவு வாயிலிலேயே நிறுத்தி மோப்ப நாய் உதவியுடன் வெடிகுண்டு நிபுணர்கள் சோதனை செய்வார்கள்.

சென்னை விமான நிலையத்தில் கடந்த டிசம்பர் மாதத்திலிருந்தே ஏழு அடுக்கு பாதுகாப்பு போடப்பட்டு உள்ளது. பாதுகாப்பு பலப்படுத்தப்பட்டு உள்ளதால் பயணிகள் முழு ஒத்துழைப்பு வழங்கி முன்னதாக வரவேண்டும் என்று விமான நிலைய அலுவலர்கள் தெரிவித்துள்ளனர்.