'பேச்சுவார்த்தை என்ற பெயரில் பெருநிறுவனங்களுக்காக மத்திய அரசு நாடகம்'- பெ.சண்முகம்!

பேச்சுவார்த்தை என்ற பெயரில் பெருநிறுவனங்களுக்காக மத்திய அரசு நாடகம் நடத்துகிறது என அகில இந்திய விவசாய சங்கத்தின் மாநில பொதுச்செயலாளர் பெ. சண்முகம் குற்றஞ்சாட்டியுள்ளார்.

சென்னை: மத்திய அரசின் வேளாண் சட்டங்களுக்கு எதிராக டெல்லியில் விவசாயிகள் போராட்டம் நடத்திவரும் நிலையில் அகில இந்திய விவசாய சங்கத்தின் மாநில பொதுச்செயலாளர் பெ. சண்முகம் யூ-டியூப் சமூக வலைதளத்தில் பதிவேற்றியுள்ள வீடியோவில் கூறியிருப்பதாவது:-

எலும்பை குத்தி கிழிக்கும் கடும் குளிரையும் பொருட்படுத்தாது குழந்தைகள் முதல் 95 வயது முதியவர்கள் வரை டெல்லியில் போராடிவருகின்றனர்.

இப்படி ஒரு போராட்டத்தை நாடு கடந்த காலங்களில் சந்தித்து இருக்காது. தற்போது புதிய சகாப்தத்தை விவசாயிகள் ஏற்படுத்திவருகின்றனர். இந்தப் போராட்டத்தின் வீழ்ச்சி நாடு முழுக்க உள்ள போராட்டக்காரர்களுக்கு உத்வேகம் அளிக்கும்படி உள்ளது. உத்தரப் பிரதேசம், பஞ்சாப், ராஜஸ்தான், உத்தரகாண்ட் உள்ளிட்ட மாநில விவசாயிகள் டெல்லிக்கு சென்று போராடினால் போதுமானது என்பதால் தமிழ்நாடு மாநில விவசாயிகள் டெல்லிக்கு செல்லவில்லை.

மாநிலத்தில் நாங்கள் போராட்டம் நடத்திவருகிறோம். டெல்லி போராட்டத்தை தடுக்க அரசாங்கம் அத்தனை அடுக்குமுறையையும் பயன்படுத்தியது. இந்த அடக்கு முறைகளை, தடுப்புகளை அடித்து உடைத்து விவசாயிகள் டெல்லி நோக்கி முன்னேறியுள்ளனர். கடந்த காலங்களில் விவசாயிகள் தற்கொலை செய்து மாண்டுள்ளனர்.

ஆனால் தற்போது விவசாயிகள் தங்களின் கோரிக்கை நிறைவேறும்வரை வீடு திரும்ப மாட்டார்கள், போராடி வெல்வோம் அல்லது போராடி மாள்வோம்.

இந்த விவகாரத்தில் மத்திய அரசு பெருநிறுவனங்களுக்கு ஆதரவாக பேச்சுவார்த்தை என்ற பெயரில் கபட நாடகம் ஆடுகிறது. விவசாயிகளின் கோரிக்கைகள் முற்றிலும் நியாயமானது. தெளிவானதும் கூட.

ஆனால் மத்திய பாஜக அரசு விவசாயிகள் மீது அவதூறு பழிகளை கூறிவருகிறது. பாஜகவுக்கு எனது கடும் கண்டனங்கள். ஆட்சியாளர்கள் போராட்டத்துக்கு எங்கிருந்து பணம் வருகிறது என்று போராட்டத்தை என்ற கேள்வியின் மூலம் திசை திரும்புகின்றனர்.

இதில் துளியளவும் உண்மையில்லை. எங்களது விவசாய பணிகளை கிராமத்தினர் செய்துவருகின்றனர். எங்களுக்கான உணவு, பணத்தை நாங்களே செலவழிக்கிறோம்.

மேலும் 500க்கும் மேற்பட்ட விவசாயிகள் இப்படியொரு போராட்டத்தை நடத்தியது இதுவரை கிடையாது. இந்தச் சட்டத்தை நாடாளுமன்ற குழுவுக்கு அனுப்பக் கோரி முதலிலே எம்.பி.க்கள் கோரிக்கை வைத்தனர். அப்போது மறுத்துவிட்டு, தற்போது நாடாளுமன்ற நிலைக்குழுவுக்கு அனுப்பிகிறோம் என்று கூறுகின்றனர்.

பேச்சுவார்த்தை இழுத்தடிப்பதற்கும் பெருநிறுவனங்கள் மற்றும் ஆட்சியாளர்கள் மட்டுமே காரணம். எந்த நிலையிலும் விவசாயிகள் காரணம் அல்ல. இந்நிலையில் போராட்டத்தை நாடு முழுவதும் விஸ்தரிக்கும் பொருட்டு டிசம்பர் 8ஆம் தேதி முழு அடைப்பு (பாரத் பந்த்) அறிவிக்கப்பட்டுள்ளது.

இந்தப் போராட்டத்துக்கு வணிகர் சங்கங்களை சேர்ந்த வெள்ளையன், விக்கிரமராஜா ஆகியோரிடமும் முழு அடைப்பு போராட்டத்துக்கு ஆதரவு கோரியுள்ளோம். இந்தப் போராட்டத்தை சமூகத்தில் அனைவரும் தன்னெழுச்சியாக ஆதரவு அளிக்க வேண்டும். இதில் தமிழ்நாட்டின் பங்களிப்பும் இருக்க வேண்டும்.

விவசாயிகள் தங்களின் கோரிக்கை நிறைவேறாமல் வீடு திரும்புவதில்லை. நாங்கள் டெல்லி மக்களும் தொந்தரவு கொடுக்கவில்லை. டெல்லிக்கு வெளியே போராடிவருகிறோம். மேலும் டெல்லியை கைப்பற்றும் எங்களது நோக்கமல்ல. ஆட்சியாளர்களுக்கு ஒரு எச்சரிக்கையை விடுக்கிறோம். அரசு உறுப்படியான யோசனைகளோடு வர வேண்டும். இல்லாவிட்டால் பேச்சுவார்த்தையால் எந்த பலனும் இல்லை.

தேசமே விவசாயிகள் பின்னால் உள்ளது. ஆகவே ஆட்சியாளர்கள் விவசாயிகளின் கோரிக்கைகளை நிறைவேற்ற வேண்டும் என்று மெத்த பணிவோடு கேட்டுக்கொள்கிறேன்” எனத் தெரிவித்துள்ளார்.

இதையும் படிங்க: 'ஒரு சில வாக்குகளுக்காக மதவாதிகளோடு கூட்டணி வைக்கவில்லை'- பினராயி விஜயன்!