முதலமைச்சர் மு.க.ஸ்டாலின் ஊழலுக்கு ஆதரவான நிலை எடுத்துள்ளதாக பார்க்கிறோம் - அறப்போர் இயக்க நிர்வாகி

தமிழ்நாடு முதலமைச்சர் மு.க. ஸ்டாலின் ஊழலுக்கு ஆதரவான நிலை எடுத்துள்ளதாக பார்க்கிறோம் என அறப்போர் இயக்கத்தின் ஒருங்கிணைப்பாளர் ஜெயராம் வெங்கடேசன் பகிரங்கமாக குற்றம்சாட்டி உள்ளார்.

சென்னைவள்ளுவர் கோட்டத்தில் அறப்போர் இயக்கத்தின் சார்பில் ’கொள்ளையனே வெளியேறு’ என்ற முழக்கத்தை எழுப்பி ஊழல்வாதிகளுக்கு எதிராக எஃப்ஐஆர் பதிவு செய்ய வேண்டும் என்பதை வலியுறுத்தியும் இன்று(ஜூன்.19) ஆர்ப்பாட்டம் நடத்தினர். ஆர்ப்பாட்டத்தின் போது ஊழல் செய்த அலுவலர்களின் பட்டியலை வெளியிட்டும் அவர்கள் செய்த ஊழல்கள் குறித்தும் விரிவாக எடுத்துக் கூறினர்.

அதன் பின்னர் செய்தியாளர்களிடம் பேசிய அறப்போர் இயக்கத்தின் ஒருங்கிணைப்பாளர் ஜெயராம் வெங்கடேசன், ”ஊழல் செய்த அலுவலர்கள் மீது எஃப்ஐஆர் பதிவு செய்து விசாரணை செய்ய வேண்டும் என வலியுறுத்தி ஆர்ப்பாட்டத்தை நடத்தி வருகிறோம். தமிழ்நாடு முதலமைச்சர் மு.க.ஸ்டாலின் ஊழலுக்கு எதிராக செயல்படுவோம் எனவும், ஊழல் செய்தவர்கள் மீது நடவடிக்கை எடுக்கப்படும் எனவும் கூறி ஆட்சிக்கு வந்தார்.

அவர் ஆட்சிக்கு வந்து ஓராண்டு கடந்தும் இதுவரை எந்தவித நடவடிக்கையும் எடுக்கப்படவில்லை. அறப்போர் இயக்கத்தின் சார்பில் 15 புகார் மனுக்கள் அளித்தோம். அதில் 2 புகார் மனுக்கள் மீது முன்னாள் அமைச்சர்களின் பேரில் வழக்குப்பதிவு செய்து உள்ளனர். ஆனால், மற்ற புகார்கள் மீது எந்தவித நடவடிக்கையும் எடுக்கவில்லை.

மேலும் இதுவரை ஒரு அலுவலர் மீது கூட முதல் தகவல் அறிக்கைப் பதிவு செய்யப்படவில்லை. ஊழல் குற்றச்சாட்டுகள் குறித்து தமிழ்நாடு முழுவதும் பல புகார்கள் அளிக்கப்பட்டுள்ளன. முதலமைச்சர் ஸ்டாலின் பதவியேற்ற பின்னர் ஓராண்டு ஆட்சி மிகவும் வேதனையாகத்தான் இருக்கிறது.

ஊழலை ஒழிப்போம் எனக் கூறி ஆட்சிக்கு வந்தவர். ஊழலுக்கு ஆதரவான நிலையை எடுத்துள்ளார்’ எனக் குற்றம் சாட்டினார்.

மேலும் அவர், 'எதிர்க்கட்சித் தலைவராக இருந்தபொழுது அவர் கூறிய குற்றச்சாட்டுகள் மீது நடவடிக்கை எடுக்க வேண்டும் என்றாலும் அலுவலர்கள் மீது எஃப்ஐஆர் போட வேண்டும். அவர் தற்போது உள்ள அலுவலர்களை காப்பாற்றுவதற்காக நடவடிக்கை மேற்கொள்கிறாரா?' என கேள்வி எழுப்பினார்.

'முன்னாள் அமைச்சர்களை காப்பாற்றுவதற்காக வேலை செய்கிறாரா என்பது குறித்து அவர்தான் தெளிவுபடுத்த வேண்டும். இது அவர் நடவடிக்கை எடுப்பதற்குத் தயாராக இல்லை என்பதைக் காட்டுகிறது. தவறு செய்த ஐஏஎஸ் அலுவலர் மீது நடவடிக்கை எடுத்தால் தான் மற்றவர்களுக்கு பயம் வரும். புதிதாக வரும் ஐஏஎஸ் அலுவலர்கள் கூட முதல் நாளிலிருந்து பணம் பார்க்கின்றனர். கடந்த 20 ஆண்டுகளில் ஒரு ஐஏஎஸ் அலுவலர்கள் மீது கூட ஊழல் வழக்குப் பதிவு செய்யப்படவில்லை.

கரூரில் நடைபெற்ற நெடுஞ்சாலைத்துறை ஊழலில் அமைச்சருக்கும் பங்கு இருந்ததால் தான் அலுவலர்களைப் பயன்படுத்தி இரவோடு இரவாக சாலை அமைத்தனர். இந்த ஆட்சியிலும் ஊழல் தொடர்ந்து நடைபெற்று வருகிறது' என பகிரங்கமாக குற்றம் சாட்டினார்.

இதையும் படிங்க:ஓபிஎஸ்ஸின் கோட்டை வலுவிழக்கிறதா? ஈபிஎஸ்ஸை ஆதரித்த தேனி மாவட்ட அதிமுகவினர்!