சென்னை:பிரதமர் நரேந்திர மோடி சென்னைக்கு ஒரு நாள் பயணமாக இன்று (மே. 26) வருகிறாா். சென்னை நேரு ஸ்டேடியத்தில் நடக்கும் விழாவில், தேசிய நெடுஞ்சாலை புதிய திட்டங்கள், ரயில்வே புதிய திட்டங்கள் உட்பட மத்திய அரசின் பல்வேறு புதிய திட்டங்களை பிரதமா் தொடங்கி வைக்கிறார்.
இந்த விழாவில் கலந்து கொள்வதற்காக பிரதமர் மோடி இன்று ஹைதராபாத்திலிருந்து தனி விமானத்தில் புறப்பட்டு மாலை 5.10 மணிக்கு சென்னை பழைய விமான நிலையம் வருகிறாா். சென்னை விமான நிலையத்தில் வரவேற்பு அளிக்கப்படுகிறது. உடனடியாக மாலை 5.15 மணிக்கு சென்னை பழைய விமான நிலையத்தில் இருந்து இந்திய விமானப்படை ஹெலிகாப்டர் புறப்பட்டு, ஐஎன்எஸ் அடையாறு செல்கிறார். அங்கிருந்து கார் மூலம் விழா நடக்கும் நேரு ஸ்டேடியத்திற்கு செல்கிறார்.
அங்கு விழாவில் கலந்து கொண்டுவிட்டு, விழா முடிந்ததும் மீண்டும் நேரு ஸ்டேடியத்தில் இருந்து காரில் புறப்பட்டு ஐஎன்எஸ் அடையாறு வருகிறார். அங்கிருந்து இந்திய விமானப் படை ஹெலிகாப்டரில் இரவு 7.30 மணிக்கு சென்னை பழைய விமான நிலையம் வருகிறாா். பிரதமருக்கு வழியனுப்பு நிகழ்ச்சி சென்னை பழைய விமான நிலையத்தில் நடக்கிறது. அது முடிந்ததும் பிரதமர் இரவு 7.40 மணிக்கு இந்திய விமானப்படை விமானத்தில் டெல்லி புறப்பட்டு செல்கிறார்.