சென்னை ராஜீவ் காந்தி அரசு பொது மருத்துவமனையில், அரசு மருத்துவர்கள் சாகும்வரை உண்ணாவிரதப் போரட்டத்தில் ஈடுபட்டுவருகின்றனர். ஊதிய உயர்வு, மேற்படிப்பில் இடஒதுக்கீடு மீண்டும் அமல்படுத்த வேண்டும் உள்ளிட்ட கோரிக்கைகளை வலியுறுத்தி அரசு மருத்துவர்களின் சங்க கூட்டமைப்பு சார்பில் இன்று ஐந்தாவது நாளாக போராடிவருகின்றனர்.
இதில் நாம் தமிழர் கட்சி ஒருங்கிணைப்பாளர் சீமான், மார்க்சிஸ்ட் கம்யூனிஸ்ட் கட்சியின் மாநிலச் செயலாளர் கே. பாலகிருஷ்ணன், இந்திய கம்யூனிஸ்ட் கட்சியின் மாநிலச் செயலாளர் முத்தரசன் உள்ளிட்ட எதிர்கட்சிகளின் முக்கிய தலைவர்கள் பலர் கலந்து கொண்டனர்.
அப்போது சீமான் பேசுகையில், "மருத்துவர்கள் மிக நியாயமான கோரிக்கைகளை முன்வைத்து உண்ணாவிரதப் போராட்டம் நடத்திவருகின்றனர். மத்திய-மாநில அரசு மருத்துவர்களுக்கு பணிநேரம் எல்லாம் ஒன்றுதான் ஆனால் மத்திய அரசு மருத்துவர்கள் 14 ஆண்டுகளில் பெறக்கூடிய சலுகைகளை இங்கு நம்முடைய மருத்துவர்கள் பெறுவதற்கு 21 ஆண்டுகள் ஆகிறது.
மருத்துவர்கள் 2017ஆம் ஆண்டு நடத்திய போராட்டத்தை அரசு கண்டு கொள்ளவில்லை. இன்று நாடு முழுவதும் வேலைநிறுத்த போராட்டத்தில் ஈடுபடவுள்ளனர். கடந்த நான்கு நாள்களாக உண்ணாவிரத போராட்டத்தில் ஈடுபட்ட இரண்டு மருத்துவர்கள் உடல்நலம் பாதிக்கப்பட்டு மருத்துவமனையில் அனுமதிக்கபட்டுள்ளனர் " என தெரிவித்தார்.
அதை தொடர்ந்து பாலகிருஷ்ணன் பேசும்போது, போராட்டத்தில் மருத்துவர்கள் நான்கு நாள்களாக உண்ணாவிரம் இருக்கின்றனர். இதுநாள் வரை மருத்துவர்களை அரசு அழைத்து பேசாத காரணத்தால் இன்று அடையாள போராட்டத்தை முன்னெடுக்கின்றனர். இதில் எதாவது அசாம்பாவாதிங்கள் நடந்தல் அதற்கு அரசும், மக்கள் சுகாதாரத்துறை அமைச்சர் தான் காரணம். மருத்துவர்களுக்கு ஆதரவாக அரசியல் கட்சிகள் ஒன்றிணைந்து ஈடுபட வேண்டிய நிலை ஏற்படும்" என்று எச்சரித்தார்.
முத்தரசன் கூறியதாவது, "மருத்துவத் துறையை சார்ந்த மக்கள் சுகாதாரத்துறை அமைச்சர் விஜயபாஸ்கர், இவர்களை வந்து சந்தித்திருக்க வேண்டும். அல்லது சங்கத்தின் முக்கிய உறுப்பினர்களை அழைத்து பேசியிருக்க வேண்டும். ஆனால் அந்த துறையின் செயலாளரும் இவர்களை நேரில் சந்திக்கவில்லை. இந்நிலை நீடித்தால் வரக்கூடிய காலங்களில் சிறப்பு மருத்துவர்கள் என்கிற இடத்தில் யாரும் இருக்க மாட்டார்கள்" எனத் தெரிவித்தார்.
அரசு மருத்துவர்கள் போராட்டம்
