மீண்டும் நிதி நெருக்கடியில் சிக்கி தவிக்கும் பொதுத்துறை வங்கிகள்!

கரோனா வைரஸ் ஏற்படுத்திய பொருளாதார நெருக்கடி காரணமாக பொதுத்துறை வங்கிகள் மீண்டும் நிதி நெருக்கடியில் சிக்கி தவிக்கின்றன. இந்நிலையில் பொதுத்துறை வங்கிகளுக்கு அடுத்த இரண்டு ஆண்டுகளில் இரண்டு லட்சத்து 10 ஆயிரம் கோடி முதலீட்டு நிதி தேவைப்படுகிறது என மூடிஸ் நிறுவனத்தின் ஆய்வறிக்கை கூறுகின்றது.

டெல்லி: அடுத்த இரண்டு ஆண்டுகளில் பொதுத்துறை வங்கிகளுக்கு ரூ.2.1 டிரில்லியன் (அதாவது ரூ.2 லட்சத்து 10 ஆயிரம் கோடி) வரை வெளி மூலதனம் தேவைப்படும், இந்தப் பற்றாக்குறையை சரிசெய்ய பெரும்பாலும் அரசாங்கத்தின் ஆதரவை வங்கிகள் எதிர்நோக்கும் என மூடிஸ் நிறுவனம் வெள்ளிக்கிழமை (ஆக.21) தெரிவித்துள்ளது.

மூடிஸின் கூற்றுப்படி, இந்தியாவின் பொருளாதார வளர்ச்சியில் நிலவும் மந்தநிலை, கரோனா வைரஸ் பரவலால் மேலும் அதிகரிக்கிறது. இது பொதுத்துறை வங்கிகளின் (பி.எஸ்.பி) சொத்துகளை பாதிக்கும், மேலும் கடன் செலவுகளையும் அதிகரிக்கலாம்.

இது குறித்து மூடிஸ் துணைத் தலைவரும் மூத்த கடன் அலுவலரான அல்கா அன்பராசு கூறுகையில், “இந்தியாவை பொறுத்தமட்டில் பொதுத்துறை வங்கிகள் ஆதிக்கம் செலுத்துகின்றன.

பொதுவாக இந்த கரோனா பரவலுக்கு மத்தியில், பொதுத்துறை வங்கிகளின் முதலீடு குறைந்துவிடும் என்று நாங்கள் எதிர்பார்க்கிறோம். ஆகவே அவர்களுக்கு வெளிமூலதனம் தேவைப்படும்.

எனவே அவர்கள் அரசாங்கத்தின் முதலீட்டை எதிர்பார்ப்பார்கள். மூடிஸ் நிறுவனம், கரோனா வைரஸ் பரவல் காரணமாக வங்கிகளில் மீண்டும் மூலதன பற்றாக்குறை என்ற தலைப்பில் இந்த ஆய்வை நடத்தியுள்ளது.

அடுத்த இரண்டு ஆண்டுகளில் இந்திய பொதுத்துறை வங்கிகளின் கடன்கள் அதிகரிக்கும் என இதன் மூலம் தெரியவருகிறது. அதாவது பொதுத்துறை வங்கிகள் 70 விழுக்காடு இழப்பை சந்திக்க நேரிடும்.

இதனால் முதல் ஆண்டில் ஒரு டிரில்லியன் (ஒரு லட்சம் கோடி) தேவைப்படும்” எனக் கூறினார்.

இதன் பொருள் என்னவென்றால், “கடந்த காலத்தில் எதிர்நோக்கியது போல், பொதுத்துறை வங்கிகள் தனது நிதி தேவையை பூர்த்தி செய்யவும், நிதி ஸ்திரத்தன்மையை உறுதி செய்யவும் அரசின் உதவியையும் நாடும்.

இதுமட்டுமின்றி, இந்தியாவில் வங்கி அமைப்பில் ஆதிக்கம் செலுத்தும் பொதுத்துறை வங்கிகள், மாநில மூலதன ஆதரவு இல்லாத நிலையில் சரியாக செயல்படத் தவறினால், நாடு பெரும் கடன் நெருக்கடியை எதிர்கொள்ளும்” என்றும் மூடிஸ் தரப்பில் தெரிவிக்கப்பட்டுள்ளது.