இங்கிலாந்தில் 5ஜி சேவையை விரிவுப்படுத்த டிசிஎஸ் நிறுவனம் தேர்வு!

இங்கிலாந்தின் அலைபேசி சேவை வழங்கும் நிறுவனமான ‘த்ரீ’ தனது பயனர்களுக்கு 5ஜி சேவையை வழங்க இந்திய தொழில்நுட்ப நிறுவனமான டிசிஎஸ்ஸை கூட்டு சேர்த்துள்ளது.

பெங்களூரு (கர்நாடகம்): இங்கிலாந்து தொலைதொடர்பு நிறுவனத்தின் 5ஜி சேவையை விரிவுப்படுத்த டிசிஎஸ் நிறுவனம் தேர்வு செய்யப்பட்டுள்ளது.

த்ரீ நிறுவனம் இங்கிலாந்து நாட்டில் மிகப்பெரும் தொலைதொடர்பு நிறுவனமாகும். அதன் புதிய 5ஜி சேவையை விரிவுப்படுத்தவும், மேம்படுத்தவும் இணைப்பு தொழில்நுட்ப நிறுவனங்களை தேர்வு செய்யும் பணிகளை மேற்கொண்டுவந்தது.

இச்சூழலில், இந்தியாவின் மிகப்பெரும் தொழில்நுட்ப நிறுவனமான டாடா கன்சல்டன்சி சர்வீசஸ் (டிசிஎஸ்) நிறுவனத்தை, தங்கள் சேவையை மேம்படுத்த தேர்வு செய்துள்ளதாக டிசிஎஸ் நிறுவனம் வெளியிட்டுள்ள அறிக்கையில் தெரிவித்துள்ளது.

இங்கிலாந்து முழுவதும் 175 நகரங்களில், 1000க்கும் மேற்பட்ட இடங்களில் 5ஜி அலைக்கற்றை மூலம் இயங்கும் தொலைதொடர்பு சேவையை த்ரீ நிறுவனம் வழங்கிவருகிறது. அந்த 5ஜி சேவைக்கான வலையமைப்பை விரிவுப்படுத்த டிசிஎஸ் நிறுவனத்தை த்ரீ தேர்ந்தெடுத்துள்ளது.

டிசிஎஸ் நிறுவனம் மென்பொருளை தயாரித்து வலையமைப்பு, அதை மேம்படுத்துவது, 3ஜி, 4ஜி மாற்றங்களை சரி செய்தல் போன்ற பணிகளை மேற்கொள்ளும் என்று கூறப்பட்டுள்ளது.