கோவிட்-19 தொற்று காரணமா இந்திய பொருளாதாரம் கடுமையாகப் பாதிக்கப்பட்டுள்ளது. இதனால் பல்வேறு தொழில்துறையினரும் கடும் இன்னல்களை எதிர்கொண்டுள்ளனர். பல நிறுவனங்கள் ஆட்குறைப்பு நடவடிக்கைகளில் ஈடுபட்டுள்ளனர். சில நிறுவனங்கள் பணியாளர்களுக்குக் கட்டாய விடுப்பு அளித்துவருகின்றனர்.
இந்நிலையில், தனது ஊழியர்களை ஜூம் செயலி மூலம் தொடர்புகொண்ட சொமெட்டோ நிறுவனத்தின் நிர்வாக இயக்குநர் தீபீந்தர் கோயல்," கடந்த சில மாதங்களில் இந்த தொழில்துறை பல்வேறு மாற்றங்களைக் கண்டுள்ளது. அவற்றில் சில மாற்றம் நிரந்தரமாகிவிட வாய்ப்புகள் அதிகம். அந்த சூழ்நிலைக்கு நிறுவனம் தயாராக வேண்டியது அவசியம்.
இதன் காரணமாக நிறுவனத்தின் 13 விழுக்காடு ஊழியர்கள் (சுமார் 600 ஊழியர்கள்) தொடர்ந்து சொமெட்டோ நிறுவனத்தில் பணிபுரிய முடியாத சூழ்நிலை ஏற்பட்டுள்ளது. இருப்பினும் அடுத்த ஆறு மாதங்களுக்கு அவர்களுக்கு 50 விழுக்காடு ஊதியம் வழங்கப்படும். மற்ற இடங்களில் வேலையைப் பெற அவர்களுக்குத் தேவையான உதவிகள் செய்யப்படும்" என்றார்.
வேலையைவிட்டு நீக்கப்பட்ட ஊழியர்கள், சொமெட்டோ வழங்கிய லேப்டாப்பையும் ஸ்மார்ட்போனையும் திருப்பி அளிக்கத் தேவையில்லை என்றும் அந்நிறுவனம் அறிவித்துள்ளது.