'தனியார் வங்கிகளிடமிருந்து கடன் கிடைக்கவில்லை'

டெல்லி: மத்திய அரசு அறிவித்த திட்டத்தின்கீழ் தங்களுக்கு எந்த ஒரு கடனுதவியும் தனியார் வங்கிகளிடமிருந்து கிடைக்கவில்லை என சிறு, குறு, நடுத்தர நிறுவனங்கள் தெரிவித்துள்ளன.

ஊரடங்கால் நாடு முழுதும் குறு, சிறு, நடுத்தர நிறுவனங்கள் முடங்கின. இவை மீண்டெழ, மூன்று லட்சம் கோடி ரூபாய் கடனுதவியை, வங்கிகள் மூலம் வழங்க, மத்திய நிதியமைச்சகம் நிர்ணயித்து அறிவித்தது.

அதன்படி, குறு, சிறு, நடுத்தர நிறுவனங்களுக்கு வங்கிகள் கடனுதவி வழங்குவதில் தீவிரம் காட்டிவருவதாக மத்திய நிதி அமைச்சர் நிர்மலா சீதாராமன் தெரிவித்தார்.

இது தொடர்பாக வங்கி அலுவலர்கள் கூறுகையில், "தங்கள் வாடிக்கையாளர்களாக உள்ள குறு, சிறு, நடுத்தர நிறுவனங்களுக்கு விண்ணப்பிப்பதற்கு முன்பே அனுமதித்து, கடனுதவியை வழங்குவது தொடர்பாக மின்னஞ்சல்கள், குறுஞ்செய்திகள் மூலம் தகவல்களை வங்கி நிர்வாகத்தினர் அனுப்பிவருகின்றனர்.

கடந்த ஜூன் 3ஆம் தேதிவரை, 13 ஆயிரம் கோடி ரூபாய் கடனுதவிக்கான ஒப்புதல் வழங்கப்பட்டுள்ளது. இதில், 6 ஆயிரம் கோடி ரூபாய் வழங்கப்பட்டுவிட்டது.

வங்கிசாரா நிதி நிறுவனங்களும், கடனுதவி வழங்குவதற்கு ஆர்வம் காட்டிவருகின்றன. குறு, சிறு, நடுத்தர நிறுவனங்களுக்கு நிதியுதவி வழங்குவது தொடர்பான விவரங்கள், நிதியமைச்சகத்தின் இணையதளத்தில் உடனுக்குடன் 'அப்டேட்' செய்யப்பட உள்ளது.

வங்கிகளின் செயல்பாடுகள் கண்காணிக்கப்பட உள்ளதால் குறு, சிறு, நடுத்தர நிறுவனங்களுக்குக் கடன் வழங்காமல் எந்த வங்கியும் நழுவ முடியாது" எனத் தெரிவித்தனர்.

தொழில் நிறுவனத்தினர் சிலர் கூறுகையில், "வங்கிகள் கடனுதவி வழங்குவதில் ஆர்வம் காட்டினாலும், தொழில் நடைமுறைகளைத் தொடங்குவதற்கான கால அவகாசம் தேவைப்படுவதால், உடனடியாகத் தொழில் நிறுவனங்கள் பலவும், கடனுதவியைப் பெற இயலவில்லை.

வழக்கமாக, வங்கிகளைத் தேடி தொழில்துறையினர் செல்ல வேண்டியிருக்கும். இந்த முறை வங்கிகளே தொழில் துறையினரைத் தேடி, கடனுதவி வழங்க முன்வருகின்றன. அதேசமயம், வங்கிகளில் கடனுக்கான ஆண்டு வட்டி விகிதம் ஆறு விழுக்காட்டிற்குள் இருக்க வேண்டும்" என்றனர்.

இந்த நிலையில் தனியார் வங்கிகள் அனைத்தும் தங்களுக்கு கடன் உதவி வழங்கவில்லை என குறு, சிறு, நடுத்தர நிறுவனங்கள் தெரிவிக்கின்றன.

இதையும் படிங்க: நிறவெறிக்கு எதிரான போராட்டத்தில் நுழைந்த ரௌடி கும்பல் - பிரிட்டன் பிரதமர் குற்றச்சாட்டு