கரோனா சிகிச்சைக்கான ஃபவிபிரவிர் மருந்து விலை 27% குறைப்பு!

லேசான, மிதமான கரோனா தொற்று பாதிப்புக்கு சிகிச்சையளிக்க உதவும் ஃபவிபிரவிர் (Favipiravir) மருந்தின் விலையை க்ளென்மார்க் மருந்து நிறுவனம் 27 விழுக்காடு குறைத்துள்ளது.

க்ளென்மார்க் பார்மாசுட்டிகல்ஸ் எனும் மருந்து நிறுவனம், தனது ஆன்டிவைரஸ் மருந்தான ஃபவிபிரவிர் (Favipiravir) மருந்தின் விலையை 27 விழுக்காடு குறைத்துள்ளது. கரோனா தொற்றால் லேசாக அல்லது மிதமாக பாதிப்படைந்தவர்களுக்குக் கொடுக்கப்படும் இந்த மருந்து, தற்போது 75 ரூபாய்க்கு விற்கப்படும் என்று தெரிவிக்கப்பட்டுள்ளது.

ஃபபிஃப்ளூ (FabiFlu) என்னும் பெயர் கொண்ட இந்த மருந்தை கடந்த மாதம் க்ளென்மார்க் நிறுவனம் அறிமுகப்படுத்தியது. அப்போது 103 ரூபாய்க்கு இந்த மாத்திரை விற்பனை செய்யப்பட்டுவந்தது.

"மருந்து சிறந்த முறையில் வேலை செய்ததாலும், அதிகளவில் தயாரிக்கப்பட்டதாலும் இந்த விலைக் குறைப்பு சாத்தியமானது. இந்த மருந்தில் உள்ள மூலப்பொருளும், தயாரிப்பதற்கான வழிமுறையும் இந்தியாவில் உள்ள க்ளென்மார் நிறுவனத்தால் உருவாக்கப்படுவதால், இதன் நன்மைகள் இந்தியா முழுக்க உள்ள நோயாளிகளிடம் சென்று சேர்கின்றன" என அம்மருந்து நிறுவனம் தரப்பில் தெரிவிக்கப்பட்டது.

"மற்ற நாடுகளில் உள்ள மருந்துடன் ஒப்பிட்டுப் பார்க்கும்போது, இந்தியாவில் உள்ள மார்க்கெட்டில் குறைந்த விலைக்கு இம்மருந்தினை எங்களால் அறிமுகப்படுத்த முடியும் என்று ஆராய்ச்சியில் தெரியவந்தது.

இந்த விலை குறைப்பின் மூலம் நாட்டில் உள்ள அனைத்து நோயாளிகளுக்கும் இம்மருந்து சென்று சேரும் என்று நம்புகிறோம்" என க்ளென்மார்க் நிறுவனத்தின் மூத்தத் துணைத் தலைவரும் இந்தியாவின் தலைமை வணிகருமான ஆலோக் மலிக் தெரிவித்தார்.

இந்த மருந்தின் செயல்திறன், பாதுகாப்பை ஆராய பரிந்துரைக்கப்பட்ட ஆயிரம் நோயாளிகளுடன் இந்நிறுவனம் ஆராய்ச்சி ஒன்றை தொடங்கியுள்ளது. கரோனா தொற்றுக்கு சிகிச்சையளிக்க உற்பத்தி, சந்தைப்படுத்துதலுக்கான ஒப்புதலை ஃபபிஃப்ளூ இந்திய மருந்து நிறுவனத்திடமிருந்து க்ளென்மார்க் நிறுவனம் கடந்த ஜூன் 20ஆம் தேதி பெற்றது.

இதையும் படிங்க...'இந்திய மருந்து நிறுவனங்கள் உலகின் சொத்து என்பதை கரோனா நிரூபித்துள்ளது' - பிரதமர் மோடி