தற்சார்பு நிதிச் சலுகை மாற்றத்தை தரும் - நிர்மலா சீதாராமன் நம்பிக்கை

டெல்லி: மத்திய அரசு அறிவித்துள்ள தற்சார்பு பொருளாதார நிதிச் சலுகை இந்திய பொருளாதாரத்தில் பெரும் மாற்றத்தை ஏற்படுத்தும் என மத்திய நிதியமைச்சர் நிர்மலா சீதாராமன் நம்பிக்கைத் தெரிவித்துள்ளார்.

கரோனா லாக்டவுன் காரணமாக ஏற்பட்டுள்ள பொருளாதார சுணக்கத்தை களைய தற்சார்பு இந்தியா திட்டம் என்ற பெயரில் ரூ. 20 லட்சம் கோடி சிறப்பு நிதிச் சலுகையை மத்திய அரசு அறிவித்தது. இது குறித்து ஏ.என்.ஐ செய்தி நிறுவனத்திற்கு மத்திய நிதியமைச்சர் நிர்மலா சீதாராமன் பிரத்யேக பேட்டியளித்துள்ளார்.

அதில் அவர் பேசியதாவது, "வணிக நடவடிக்கைகள் தொடர்வதற்கு சிறப்பு நிதிச் சலுகை அறிவிப்பு அவசியமான ஒன்று. லாக்டவுன் அறித்தவுடன் பிரதமர் கரிப் கல்யாண் திட்டத்தின் மூலம் நேரடி பண உதவி அளிக்கப்பட்டது. நேரடி பணப் பரிவர்த்தனையுடன் நிறுத்திக்கொள்ளாமல் அதன் தொடர்ச்சியாக சிறப்பு நிதிச் சலுகையும் அளிக்கப்பட்டுள்ளது.

இந்த நிதிச் சலுகை அறிவிப்பு வர்த்தக நடவடிக்கையில் பல்வேறு தாக்கத்தை ஏற்படுத்தும். சந்தையின் தற்போதையச் சூழலைக் கணக்கில் கொண்டு தொலைநோக்குப் பார்வையில் இந்தத் திட்டம் செயல்படுத்தப்பட்டுள்ளது. வணிக நடவடிக்கைகள் மீண்டெழுவதற்கு வங்கிகள் மூலம் கடன் வழங்கும் திட்டம் செயல்படுத்தப்பட்டுள்ளது. அதற்காக வங்கிகளுக்கும் ரிசர்வ் வங்கி மூலம் நிதிச் செலுத்தப்பட்டு, பணப்புழக்கம் உறுதி செய்யப்பட்டுள்ளது. இது வருங்காலங்களில் பெரும் மாற்றத்தை நிச்சயம் ஏற்படுத்தும்" என நிர்மலா சீதாராமன் தெரிவித்துள்ளார்.

இதையும் படிங்க:இன்ஸ்டாகிராமின் புதிய அம்சமான ‘வழிகாட்டி’