வெஸ்ட் இண்டீஸ் அணிக்கு தொடரும் சோகம்... நட்சத்திர வீரர் விலகல்

காயம் காரணமாக உலகக்கோப்பையில் மீதமுள்ள போட்டியில் இருந்து வெஸ்ட் இண்டீஸ் அணியின் நட்சத்திர ஆல்ரவுண்டர் ஆன்ட்ரே ரஸல் விலகியுள்ளார்.

இங்கிலாந்தில் நடைபெற்று வரும் உலகக்கோப்பை தொடரில் வெஸ்ட் இண்டீஸ் அணி பரிதாபமான நிலையில் உள்ளது. இந்தத் தொடரில் விளையாடிய ஆறு போட்டிகளில் ஒரு வெற்றி, நான்கு தோல்வி, ஒரு போட்டி முடிவு இல்லை என மூன்று புள்ளிகளுடன் எட்டாவது இடத்தில் உள்ளது. இதனால், வெஸ்ட் இண்டீஸ் அணிக்கு ஏஞ்சியுள்ள மூன்று போட்டிகளிலும் வெற்றி பெற்றால் மட்டுமே அரையிறுதிச் சுற்றுக்கு முன்னேற முடியும் என்ற இக்கட்டான நிலையில் உள்ளது.

இதைத்தொடர்ந்து, வெஸ்ட் இண்டீஸ் அணி வரும் வியாழக்கிழமை (27.06.19) மான்செஸ்டரில் நடைபெறும் போட்டியில் இந்திய அணியை எதிர்கொள்கிறது. இந்நிலையில், காயம் காரணமாக வெஸ்ட் இண்டீஸ் அணியில் இருந்து நட்சத்திர ஆல்ரவுண்டர் ரஸல் விலகுவதாக, தெரிவிக்கப்பட்டுள்ளது. ஏற்கனவே பரிதாபமான நிலையில் இருக்கும் வெஸ்ட் இண்டீஸ் அணிக்கு இந்த செய்தி மேலும் அவர்களுக்கு பின்னடவை ஏற்படுத்தியுள்ளது.

இதைத்தொடர்ந்து, மீஞ்சியுள்ள மூன்று போட்டிகளில் அவருக்கு மாற்று வீரராக சுனில் அம்ப்ரிஸ் தேர்ந்தெடுக்கப்பட்டுள்ளார்.வெஸ்ட் இண்டீஸ் அணியின் நட்சத்திர ஆல்ரவுண்டராக திகழும் ரஸல் இந்தத் தொடரில் சிறப்பாக விளையாடி, அணியின் வெற்றிக்கு முக்கிய பங்கு வகிப்பார் என எதிர்பார்க்கப்பட்டது. ஆனால், இந்தத் தொடரில் அவர் விளையாடிய நான்கு போட்டிகளில் ஐந்து விக்கெட்டுகளையும், 36 ரன்களை மட்டுமே எடுத்து மோசமான ஆட்டத்தை வெளிப்படுத்தியுள்ளார்.

குறிப்பாக வங்கதேச அணிக்கு எதிரான போட்டியில் காலில் ஏற்பட்ட காயத்தால் அவர் பந்துவீச மிகவும் சிரமப்பட்டார். இதனால், நியூசிலாந்துக்கு எதிரான போட்டியில் ரஸலுக்கு பதிலாக கார்லோஸ் பிராத்வெயிட் அணியில் சேர்க்கப்பட்டார் என்பது குறிப்பிடத்தக்கது.