கொலை வழக்குகள் எத்தனை? - அறிக்கை தாக்கல் செய்ய உயர் நீதிமன்ற மதுரைக் கிளை உத்தரவு...!

மதுரை: வன்கொடுமை தடுப்பு சட்டத்தின்கீழ் பதியப்பட்ட கொலை வழக்குகள் எத்தனை? என்பது குறித்து தமிழ்நாடு உள்துறைச் செயலர் நிலை அறிக்கை தாக்கல் செய்ய வேண்டும் என உயர் நீதிமன்ற மதுரைக்கிளை உத்தரவிட்டுள்ளது.

வாடிப்பட்டி பொட்டுலுபட்டியைச் சேர்ந்த தனபால் என்பவர் உயர் நீதிமன்ற மதுரைக் கிளையில் மனு ஒன்றை தாக்கல் செய்திருந்தார். அந்த மனுவில் கூறியதாவது, 'கொலை, மரணம், பாலியல் வன்புணர்வு ஆகியவற்றால் பாதிக்கப்பட்ட ஆதிதிராவிடர், பழங்குடியினர் பிரிவைச் சேர்ந்தவர்களின் குடும்பத்தினருக்கு மூன்று மாதத்தில் உரிய நிவாரணம் வழங்க வேண்டும், மாதம் 4500 ரூபாய் நிவாரணத் தொகை, குடும்ப உறுப்பினர் ஒருவருக்கு அரசு வேலை, வீட்டு மனை, பாதிக்கப்பட்டோரின் குழந்தைகளுக்கு கல்வி, மூன்று மாதங்களுக்கு வீட்டுக்கு தேவையான அரசி, கோதுமை, பருப்பு ஆகியவற்றை வழங்க வேண்டும் எனக் கூறப்பட்டுள்ளது.

மேலும் சட்டப்படி பாதிக்கப்பட்டோரின் ஆதிதிராவிடர், பழங்குடியினர் குடும்பத்தினருக்கு நிவாரணம் வழங்கப்படவில்லை. இது தொடர்பாக கொலையானவர்களின் குடும்பத்தினரிடம் விசாரித்தபோது, நிவாரண நிதி மட்டும் வழங்கியதாகவும், பிற நிவாரணங்களை வழங்கவில்லை எனத் தெரிவித்தனர்.

ஆகவே வன்கொடுமையால் பாதிக்கப்பட்டவர்களை கண்டறிந்து, பாதிக்கப்பட்டவர்களின் குடும்பத்தினருக்கு ஆதிதிராவிடர், பழங்குடியினர் விதிகளின் அடிப்படையில் விவசாய நிலம், வேலைவாய்ப்பு, உதவித்தொகை வழங்க உத்தரவிட வேண்டும்' என மனுவில் கோரியிருந்தார்.

இம்மனு நீதிபதிகள் சத்யநாராயணன், ராஜமாணிக்கம் ஆகியோர் அடங்கிய அமர்வு முன்பு விசாரணைக்கு வந்தது. அப்போது,"வன்கொடுமை தடுப்பு சட்டத்தின்கீழ் பதியப்பட்ட வழக்குகள் எத்தனை? அவர்களில் எத்தனை குடும்பத்தினருக்கு விவசாய நிலம், அரசு வேலைவாய்ப்பு, மாத உதவித்தொகை வழங்கப்பட்டு உள்ளது என்பது குறித்து தமிழ்நாடு உள்துறைச் செயலர் நிலை அறிக்கை தாக்கல் செய்ய வேண்டும் எனக் கூறி, விசாரணை நான்கு வாரங்களுக்குத் தள்ளி வைத்து உத்தரவிட்டனர்.