ஆந்திர மருத்துவரை மருத்துவமனையில் இருந்து விடுவிக்க உயர் நீதிமன்றம் உத்தரவு

மருத்துவர் சுதாகரின் தாயார் தாக்கல் செய்த மனுவை விசாரித்த ஆந்திர மாநில உயர் நீதிமன்றம், இடைநீக்கம் செய்யப்பட்ட மருத்துவரை கண்காணிப்பாளரின் அனுமதியுடன் அரசு மருத்துவமனையில் இருந்து வெளியேற்ற அனுமதி அளித்துள்ளது. மேலும், இவ்வழக்கை விசாரித்து வரும் சிபிஐ-க்கு ஒத்துழைக்கும்படி நீதிமன்றம் கூறியுள்ளது.

அமராவதி (ஆந்திரப் பிரதேசம்): விசாகப்பட்டினத்தில்தற்போதுஉள்ள அரசு மருத்துவமனையில் வைக்கப்பட்டுள்ள மருத்துவர் சுதாகர் மருத்துவமனையை விட்டு வெளியேற ஆந்திர மாநில உயர் நீதிமன்றம் இன்று (ஜூன் 5) அனுமதியளித்துள்ளது.

மருத்துவர் சுதாகரின் தாயார் காவேரி தாக்கல் செய்த ஆட்கொணர்வு மனுவை விசாரித்த நீதிபதிகள், மருத்துவமனையின் கண்காணிப்பாளர் அனுமதியுடன் சுதாகர் அங்கிருந்து வெளியேறலாம் என்று கூறியுள்ளனர்.

மேலும், இவ்வழக்கு குறித்து சிபிஐ விசாரித்து வருவதால், அவற்றுக்கு தவறாமல் ஒத்துழைப்பு வழங்கும்படி மருத்துவர் சுதாகரிடம் நீதிமன்றம் கேட்டுக்கொண்டுள்ளது. உயர் நீதிமன்றத்தின் இவ்வுத்தரவால் மிகுந்த மகிழ்ச்சி அடைந்ததாக மருத்துவர் சுதாகரின் தாயார் தெரிவித்துள்ளார்.

இத்தீர்ப்பு குறித்து அவர் தெரிவிக்கையில், “அரசிடம் இருந்து எனக்கு பல அச்சுறுத்தல்கள் வந்தன. எனினும், சிபிஐ மீது எனக்கு நம்பிக்கை உள்ளது. என் மகனை நல்ல மருத்துவமனையில் சேர்ப்பேன்” என்று கூறியுள்ளார்.