70% மானியத்துடன் ஆதிதிராவிட விவசாயிகளுக்கு சூரியச் சக்தியில் இயங்கும் பம்புசெட் வழங்கும் அரசு!

பெரம்பலூர் : ஆதிதிராவிட விவசாயிகள் மின் கட்டமைப்பு சாராத தனித்து இயங்கும் சூரியச் சக்தி பம்புசெட்டுகளை அரசு மானியத்துடன் வாங்கிக் கொள்ளலாம் என பெரம்பலூர் மாவட்ட நிர்வாகம் அறிவித்துள்ளது.

இது தொடர்பாக பெரம்பலூர் மாவட்ட ஆட்சியர் சாந்தா இன்று (ஆக.24) வெளியிட்டுள்ள செய்திக் குறிப்பில், "மத்திய அரசின் பிரதமரின் விவசாயிகளுக்கான எரிசக்தி பாதுகாப்பு மற்றும் வாழ்வாதாரத்தை மேம்படுத்தும் திட்டத்தின் கீழ் ஆதிதிராவிட விவசாயிகளுக்கு 5 முதல் 10 குதிரைத்திறன் கொண்ட திறந்தவெளிக் கிணறுகள் ஆழ்குழாய் கிணறுகளில் சூரிய சக்தியால் இயங்கும் பம்பு செட்டுகளை 70% அரசு மானியத்தில் செயல்படுத்த நிதி ஒதுக்கீடு செய்யப்பட்டுள்ளது.

நடப்பு 2020 -2021 ஆம் ஆண்டு நிதி ஆண்டில் பெரம்பலூர் மாவட்டத்தில் ஆதிதிராவிட விவசாயிகளுக்கு 199 சூரிய சக்தியில் இயங்கும் மோட்டார் பம்பு செட்டுகள் அமைப்பதற்கு இலக்கு நிர்ணயிக்கப்பட்டுள்ளது.

சூரிய சக்தியால் இயங்கும் ஐந்து முதல் பத்து குதிரைத்திறன் வரையுள்ள ஏ.சி மற்றும் டி.சி நீர்மூழ்கி பம்பு செட்டுகள் மற்றும் தரை மட்டத்தில் அமைக்கும் மொனாப்ளாக் பம்பு செட்டுகள் இதுவரை மின் இணைப்பு பெறப்படாத நீர் பாசனத்திற்காக ஆதாரங்களுக்கு 70% மானியத்தில் மத்திய அரசின் வழிகாட்டு நெறிமுறைகளின்படி வழங்கப்படுகிறது.

தமிழ்நாடு மின் உற்பத்தி மற்றும் பகிர்மான கழகத்தின் மூலம் இலவச மின் இணைப்பு கோரி ஏற்கனவே விண்ணப்பித்துள்ள விவசாயிகள், அவர்களது உரிமையை துறக்க வேண்டிய அவசியம் இல்லை.

தங்களுக்குரிய இலவச இணைப்பு முறை வரும் பொழுது சூரிய சக்தியால் இயங்கும் பம்பு செட்டுகள் மின் கட்டமைப்புடன் இணைப்பதற்கான சம்மத கடிதத்தை சம்பந்தப்பட்ட உதவி செயற்பொறியாளர் வேளாண்மை பொறியியல் துறை அலுவலகத்தில் வழங்க வேண்டும்.

இதுவரை இலவச மின் இணைப்பு கோரி விண்ணப்பிக்காத விவசாயிகள் இத்திட்டத்தின் கீழ் சூரியசக்தி பம்பு செட்டுகளை அமைத்துவிட இலவச மின் இணைப்பு கோரி தமிழ்நாடு மின் உற்பத்தி மற்றும் பகிர்மான கழகத்தில் பதிவு செய்ய வேண்டிய அவசியம் இல்லை.

ஆற்றுப்படுகை மற்றும் நீர் நிலைகளில் இருந்து 200 மீட்டருக்குள் கரை இடப்படாத கால்வாய்களில் இருந்து 50 மீட்டருக்குள் நிலத்தடி நீரை இறப்பதற்கு அனுமதி கிடையாது.

மேலும், மேற்கண்ட தொலைவிற்குள் நிலத்தடி நீரை இறைக்க வேண்டுமானால் பொதுப்பணித்துறையினர் இருந்து தடையில்லா சான்று பெற வேண்டும் மேற்படி வரம்பிற்குள் உள்ள நீர் நீர் ஆதாரங்களுக்கு சூரிய சக்தியால் இயங்கும் பம்பு செட்டுகள் அமைத்திட விண்ணப்பிக்கும் போது பொதுப்பணித்துறையின் தடையில்லா சான்றிதழ் இணைத்திட வேண்டும்.

இத்திட்டத்தின் மூலம் பயன்பெற விரும்பும் விவசாயிகள் வேளாண் பொறியியல் உதவி செயற் பொறியாளர் அலுவலகத்தில் தொடர்பு கொண்டு பயன்பெறலாம்" என செய்திக்குறிப்பில் தெரிவிக்கப்பட்டுள்ளது.