டென்னிஸ்: ஃபெடரர் அதிர்ச்சி தோல்வி

மாட்ரிட் ஓபன் டென்னிஸ் தொடரின் காலிறுதிப் போட்டியில் சுவிட்சர்லாந்து வீரர் ரோஜர் ஃபெடரர் அதிர்ச்சி தோல்வி அடைந்தார்.

2019ஆம் ஆண்டுக்கான மாட்ரிட் ஓபன் டென்னிஸ் தொடர், ஸ்பெயின் தலைநகர் மாட்ரிட்டில் நடைபெற்று வருகிறது. இதில், ஆடவர் ஒற்றையர் பிரிவு காலிறுதிச் சுற்றில் சுவிட்சர்லாந்தின் நட்சத்திர வீரர் ரோஜர் ஃபெடரர், ஆஸ்திரியாவின் டாமினிக் தியமை எதிர்கொண்டார்.

இதில், முதல் செட்டை 6-3 என்ற கணக்கில் வென்ற ஃபெடரர், இரண்டாவது செட்டை 6-7 என்ற கணக்கில் டாமினிக்கிடம் போராடி தோல்வி அடைந்தார். இதையடுத்து, ஆட்டத்தின் வெற்றியாளரை தீர்மானிக்கும் மூன்றாவது செட்டில் டாமினிக்கின் அசத்தலான ஆட்டத்துக்கு ஈடுகொடுக்க முடியாமல் ஃபெடரர் 4-6 என்ற கணக்கில் வீழ்ச்சி அடைந்தார். இதன் மூலம் ஃபெடரர் இப்போட்டியில் 6-3, 6-7, 4-6 என்ற செட் கணக்கில் தோல்வி அடைந்து தொடரிலிருந்து வெளியேறினார்.