ஒழுங்குமுறை விற்பனைக் கூடத்தில் குறைந்த விலைக்கு பருத்தி ஏலம்: விவசாயிகள் சாலை மறியல்!

நாகப்பட்டினம்: செம்பனார்கோவில் ஒழுங்குமுறை விற்பனைக் கூடத்தில் அரசின் ஆதார விலையை விட மிகக் குறைந்த விலைக்கே பருத்தி ஏலம் எடுக்கப்பட்டதால் விவசாயிகள் சாலை மறியல் போராட்டத்தில் ஈடுபட்டனர்.

நாகப்பட்டினம் மாவட்டம், தரங்கம்பாடி தாலுக்கா செம்பனார்கோவில் ஒழுங்குமுறை விற்பனைக் கூடத்தில் பருத்தி ஏலம் இன்று (ஜூன் 16) நடைபெற்றது. இதில், 700க்கும் மேற்பட்ட விவசாயிகள் கலந்துகொண்டனர். ஏலத்தில், அரசு குறைந்தபட்ச ஆதார விலையாக 12 விழுக்காடு ஈரப்பதம் உள்ள பகுதி பருத்தி குவிண்டாலுக்கு ஐந்தாயிரத்து 232 ரூபாய் விலை நிர்ணயம் செய்துள்ளது.

இந்திய பருத்தி கழகம் அலுவலர் இளங்கோவன் முன்னிலையில் நாகை, திருவாரூர், விழுப்புரம், காரைக்கால், தஞ்சாவூர் உள்ளிட்ட 15 மாவட்டங்களில் இருந்து வந்த தனியார் வியாபாரிகள் மறைமுக ஏலத்தில் கலந்து கொண்டனர். அப்போது, குவிண்டால் ஒன்றுக்கு அதிகபட்சமாக ரூ. 5,500 என்றும் குறைந்தபட்சமாக ரூ. 3,300 வரை விலை நிர்ணயம் செய்தனர்.

இந்திய பருத்தி கழகம் அலுவலர்கள் கூடுதலாக விலை நிர்ணயம் செய்ததாகவும், ஆனால் ஈரப்பதம், பருத்தியின் தரம் ஆகியவற்றை காரணமாக கூறி அரசு அறிவித்த ஆதார விலையை விட ரூ. 3,300 என்ற மிக குறைந்த விலையை தனியார் வியாபாரிகள் விலை நிர்ணயம் செய்தனர். இதனால், ஆத்திரமடைந்த விவசாயிகள் விற்பனைகக் கூட வாயிலில் சாலை மறியலில் ஈடுபட்டனர்.

இது குறித்து விவசாயிகள் கூறுகையில், "குறைந்த விலைக்கு கொள்முதல் செய்வதற்கு ஈரப்பதம் அறியக்கூடிய கருவியை வைத்துக் கொள்ளவில்லை. எலக்ட்ரானிக் தராசு பயன்படுத்தவில்லை. தனியார் வியாபாரிகள் நினைத்த விலையை நிர்ணயிக்கின்றனர். அதற்கு ஒழுங்குமுறை விற்பனைக்கூட அலுவலர்கள் தனியார் வியாபாரிகளுக்கு துணைபோகின்றனர் எனத் தெரிவித்தனர்.

ஒரு மணி நேரத்திற்கும் மேலாக போராட்டம் நீடித்த நிலையில் மயிலாடுதுறை மாவட்ட துணை காவல் கண்காணிப்பாளர் அண்ணாதுரை, வருவாய் துறையினர் விவசாயிகளிடம் பேச்சுவார்த்தை நடத்தினர். அதன் முடிவில் நான்காயிரத்திற்கும் குறைவாக ஏலம் மூலம் எடுக்கப்பட்ட 125 விவசாயிகளுக்கு வருகின்ற புதன்கிழமை (ஜூன் 17) மீண்டும் மறு ஏலம் நடத்தப்படும் என்றும் உறுதி அளித்ததால் போராட்டத்தை கைவிட்டு விவசாயிகள் கலைந்துச் சென்றனர்.

இதையும் படிங்க:கரோனா எதிரொலி: முழு உரடங்கின் போது கண்காணிப்பை தீவிரப்படுத்தும் காவல்துறை!