இந்தியா-சீனா எல்லைப் பகுதிகளான லடாக்கின் கல்வான் பள்ளத்தாக்கில் சீனாவுடன் நடைபெற்ற மோதலில் இந்திய ராணுவ வீரர்கள் 20 பேர் வீரமரணம் அடைந்தனர்.
நாட்டிற்காக உயிர்த்தியாகம் செய்த இவர்களுக்குப் பல்வேறு தரப்பினரும், தங்களது இரங்கலைத் தெரிவித்து வருகின்றனர்.
இந்நிலையில் லடாக் எல்லைப் பிரச்னை குறித்தும், பிரதமர் மோடி குறித்தும் சர்ச்சைக்குரிய வகையில் ட்வீட் செய்ததற்காக சிஎஸ்கே அணியின் மருத்துவர் மது தொட்டப்பிலிலை சிஎஸ்கே நிர்வாகம் பணி இடைநீக்கம் செய்துள்ளது.
மோசமான ரசனையை வெளிப்படுத்தும் விதமாக, இவரது பதிவு அமைந்திருந்ததால் இவரை சிஎஸ்கே நிர்வாகம் இடைநீக்கம் செய்துள்ளது.
இதுதொடர்பாக சிஎஸ்கே(CSK) அணி, தனது அதிகாரப்பூர்வ ட்விட்டர் பக்கத்தில், 'மருத்துவர் மது தொட்டப்பிலிலின் தனிப்பட்ட ட்வீட் குறித்து, சென்னை சூப்பர் கிங்ஸ் நிர்வாகம் அறிந்திருக்கவில்லை. அணியின் மருத்துவர் பதவியிலிருந்து அவர் இடைநீக்கம் செய்யப்பட்டுள்ளார்.
அணி நிர்வாகத்தின் கவனத்திற்குத் தெரியாமல், அவர் பதிவிட்ட இந்த மோசமான ட்வீட்டிற்காக சிஎஸ்கே அணி வருந்துகிறோம்' எனக் குறிப்பிட்டிருந்தது.
