ஈரோட்டிற்குள் இ-பாஸ் இல்லாமல் வந்தால் கடும் நடவடிக்கை - எஸ்.பி. சக்தி கணேசன் எச்சரிக்கை

ஈரோடு: தமிழ்நாட்டில் கரோனா பாதித்த மாவட்டங்களில் இருந்து ஈரோடு மாவட்டத்திற்கு இ-பாஸ் இல்லாமல் வரும் நபர்கள் மீது கடும் நடவடிக்கை எடுக்கப்படும் என மாவட்ட காவல் கண்காணிப்பாளர் சக்தி கணேசன் எச்சரித்துள்ளார்.

ஈரோடு மாவட்ட காவல் கண்காணிப்பாளர் அலுவலகத்தில் மாவட்ட காவல் கண்காணிப்பாளர் சக்தி கணேசன் செய்தியாளர்களைச் சந்தித்தார். அப்போது அவர் கூறுகையில், “ஈரோடு மாவட்டத்தில் கரோனா பாதிப்புகளைக் கட்டுப்படுத்தும் விதமாக 135 சோதனைச்சாவடிகள் அமைக்கப்பட்டுள்ளன.

குறிப்பாக, தமிழ்நாடு - கர்நாடக எல்லைகள் மற்றும் மாவட்ட எல்லை சோதனைச்சாவடிகளில் கண்காணிப்புகள் தீவிரப்படுத்தப்பட்டுள்ளன. மண்டல பகுதிகளில் வாகன போக்குவரத்து உள்ளதால் 42 இடங்களில் கண்காணிப்புகள் தீவிரப்படுத்தப்பட்டுள்ளன.

கோவை, சேலம், நாமக்கல், கரூர், திருப்பூர், நீலகிரி உள்ளிட்ட மேற்கு மண்டல பகுதிகளில் இருந்து வருபவர்களுக்கு இ-பாஸ் எதுவும் தேவையில்லை என்பதால் அங்கிருந்து வருபவர்களும் முழுமையாக சோதனைக்கு பிறகே அனுமதிக்கப்பட்டு வருகின்றனர்.

தமிழ்நாடு அரசும் மாவட்ட நிர்வாகமும் கூறும் வழிமுறைகளை மக்கள் முழுமையாகக் கடைப்பிடிக்க வேண்டும். குறிப்பாக முகக்கவசங்கள் கட்டாயம் அணிய வேண்டும். மாவட்டத்திற்குள் இ-பாஸ் இல்லாமல் வருபவர்கள் மீது கடுமையான நடவடிக்கை எடுக்கப்படும்” என்றார்.